Böyük Britaniya hökuməti Rusiyanın “kölgə donanması” üzərində nəzarəti gücləndirmək üçün bu həftə Avropa İttifaqına müraciət etmək niyyətindədir. Bu məsələnin iyulun 18-də Böyük Britaniyanın baş naziri Kir Starmerin ev sahibliyi edəcəyi Avropa Siyasi Birliyinin iclası çərçivəsində müzakirə edilməsi planlaşdırılır. Rusiya Federasiyasının sanksiyalardan yayınmaq üçün “kölgə donanmasının” neft tankerlərindən istifadə etdiyi iddia edilir.

Valyuta.az xəbər verir ki, bu barədə "Bloomberg" mənbələrə istinadən yazıb.

Agentliyin nəzərdən keçirdiyi yekun bəyanat layihəsinə əsasən, bir sıra Avropa ölkələri “kölgə donanması”na qarşı tədbirləri dəstəkləyəcək. Onların məqsədi Rusiya nefti ilə tankerlər haqqında məlumat mübadiləsi və hərəkətlərin əlaqələndirilməsi olacaq. Böyük Britaniyanın təklifini dəstəkləmək niyyətində olan ölkələrin sayı hələlik məlum deyil. 

Anonim mənbənin "Bloomberg"ə verdiyi məlumata görə, mümkün tədbirlər Rusiya neftini daşıyan əksər tankerlərə qarşı sanksiyaların tətbiqini əhatə edə bilər.

İyunun sonunda Avropa İttifaqı Rusiyaya qarşı 14-cü sanksiyalar paketini qəbul edib. Məhdudlaşdırıcı tədbirlər arasında neft və neft məhsullarının qiymət tavanından yan keçmək üçün istifadə edilən “kölgə donanması”nın 27 gəmisinə qarşı sanksiyalar da var. "Bloomberg"in daha sonra yazdığı kimi, sanksiyaya məruz qalan Rusiya neft tankerləri aylardır limanlarda boş oturublar.

Paşa Məmmədli