Ümumdünya Qızıl Şurasının (WGC) hesabatına görə, qızıl bir daha 2024-cü ilin birinci yarısında qiyməti 12% artaraq ən yaxşı performans göstərən aktivlərdən biri olaraq qalıb.

Valyuta.az xəbər verir ki, qızılın qiyməti martın ortalarından mayın ortalarına qədər bir neçə dəfə tarixi maksimuma çatıb və ilin əvvəlindən 12% artıb. Ümumdünya Qızıl Şurası qeyd edir ki, ikinci rübün çox hissəsində o, bir unsiya üçün 2,3 min dollardan yuxarı qiymətdə olub.

WGC hesab edir ki, qızıl qiymətlərinin artmasına mərkəzi bank alışları, Asiya investorlarının fəaliyyəti, geosiyasi gərginliklər və istehlakçı tələbi səbəb olub. Həmçinin mərkəzi banklardan tələbatın 2023-cü ildə qızıl qiymətlərində ən azı 10%, bu il isə potensial olaraq daha 5% artımına töhfə verəcəyi təxmin edilir.

Dünya Qızıl Şurasının qeyd etdiyi kimi, qiymətli metalın bahalaşması davam edə bilər. Hesabatda deyilir: “Qızıl üçün katalizatorun Qərb investisiya axınını cəlb edən inkişaf etmiş bazarlarda daha aşağı faiz dərəcələri, eləcə də artan səhm bazarı risklərini və davam edən geosiyasi gərginlikləri sığortalamaq istəyən qlobal investorların dəstəyi ola bilər”.

Qızılın perspektivi, mərkəzi banklardan zəif tələb və Asiya investorlarının mənfəət götürməsi kimi risklərdən məhrum deyil, lakin WGC qlobal investorların təhlükəsiz sığınacaq aktivi kimi qızıldan faydalanmağa davam edəcəklərini bildirib. Bundan əlavə, Qərbdən böyük tələb olmadığı halda qızıla yüksək tələbat bazarın hələ çox doymadığını və böyüməyə davam edə biləcəyini göstərir, - WGC qeyd edir.

Nicat