Çin Milli Kosmik Administrasiyasının (CNSA) direktor müavini Bian Zhiqanq keçirdiyi mətbuat konfransında bildirib ki, ölkə 2030-cu ilə qədər Marsdan nümunələr toplamaq üçün missiyaya başlayacaq. 

Valyuta.az xəbər verir ki, bu barədə TASS məlumat yayıb.

"Pekin 2025-ci ilə qədər asteroidləri araşdırmaq üçün "Tianven-2" missiyasını, ardınca Marsdan nümunələr toplamaq üçün "Tianven-3" missiyasını və 2030-cu ilə qədər Yupiter sistemini araşdırmaq üçün "Tianven-4" missiyasını işə salmağı planlaşdırır", deyə direktor müavini bildirib.

Bundan əvvəl “SpaceNews” portalı Çinin kerosin və maye oksigenlə işləyən üç YF-100K mühərriki ilə təchiz edilmiş “Long March 10” superağır raketinin birinci mərhələsinin prototipini uğurla sınaqdan keçirdiyi barədə məlumat vermişdi. "Long March 10"un tam birinci mərhələsində yeddi YF-100K mühərriki olacaq.

Cihaz Çinin Ay proqramı çərçivəsində yaradılır. Onun köməyi ilə Çin hakimiyyəti 2030-cu ilə qədər Yerin peykinə taykonavtlar göndərmək niyyətindədir.

Paşa Məmmədli