Qırğızıstan parlamenti ölkədə uran yataqlarının işlənməsinə 2019-cu ildə qoyulmuş moratoriumu ləğv edib. 

Valyuta.az xəbər verir ki, bu barədə "RİA Novosti" respublikanın qanunvericilik assambleyasının mətbuat xidmətinə istinadən məlumat yayıb.

Məlumatda deyilir ki, deputatlar respublikanın bəzi qanunvericilik aktlarına dəyişiklikləri nəzərdən keçirərək qəbul ediblər. O cümlədən, uran və torium yataqlarının axtarışı, kəşfiyyatı və işlənməsi məqsədi ilə yerin təkinin geoloji tədqiqi ilə bağlı fəaliyyətin qadağan edilməsi haqqında qanun ikinci və üçüncü oxunuşda qüvvədən düşmüş hesab edilib.

Mətbuat xidməti qeyd edib ki, qanun layihəsinin təşəbbüskarı baş nazir Akılbek Japarovdur. Açıqlamada həmçinin vurğulanıb ki, qanunun qəbulu ətraf mühitə mənfi təsirin azaldılması məqsədilə uran və toriumun çıxarılması üçün müasir texnologiyaların dövlət qurumları tərəfindən monitorinqi ilə müşayiət olunacaq.

"Nazirlər Kabinetinin sədri Akılbek Japarov vurğuladı ki, qanun layihəsi uran və torium yataqlarının deyil, titanomagnetit yataqlarının işlənməsinə yönəlib”, deyə parlament əlavə edib.

Paşa Məmmədli