Polşanın kənd təsərrüfatı nazirinin müavini Miçal Kolodjeyçak bildirib ki, Varşava sabah planlaşdırılan kənd təsərrüfatı məsələləri üzrə Ukrayna ilə danışıqları ləğv edib. 

Valyuta.az xəbər verir ki, onun sözlərinə görə, qərar danışıqlar aparan bəzi ukraynalı şəxslərin korrupsiya ittihamları ilə bağlı qəbul edilib.

O, konkret kimdən danışdığını dəqiqləşdirməyib: "Əlbəttə, biz korrupsiya ittihamı irəli sürülən şəxslərlə danışıqlar aparmayacağıq".

Kənd təsərrüfatı nazirinin müavini etiraf edib ki, Polşa KTN fermerlərin kütləvi etirazlarına səbəb olan bütün problemlərini hələ də həll edə bilməyib. O əlavə edib ki, vəziyyət asan deyil.

Ötən həftə Ali Rada Ukraynanın baş nazirinin müavini və infrastruktur naziri Aleksandr Kubrakovun vəzifəsindən azad edilməsinə səs verib. Həmçinin aqrar siyasət naziri Nikolay Solski tutduğu vəzifədən azad edilib. Sonuncu 291 milyon UAH dəyərində dövlət torpağını qanunsuz əldə etməkdə və daha 190 milyon UAH dəyərində torpaq sahəsini ələ keçirməyə cəhddə ittiham olunur.

Xatırladaq ki, polşalı fermerlər 2023-cü ilin noyabrında Polşaya ucuz Ukrayna taxılının tədarükü ilə əlaqədar Ukrayna ilə sərhəddə avtomobil keçid məntəqələrini bağlamağa başlayıblar. Xüsusilə, fermerlər 2022-ci ilin iyununda tətbiq edilən Ukrayna kənd təsərrüfatı məhsullarının Avropa İttifaqına (Aİ) rüsumsuz idxalından narazıdırlar. Aprel ayında Avropa Parlamenti və Aİ Şurası rüsumsuz idxalın 2025-ci il iyunun 5-dək uzadılması barədə razılığa gəlib.

Paşa Məmmədli