Martın sonunda qlobal mərkəzi banklar öz ehtiyatlarında qızılın həcmini ümumilikdə 15,7 ton artırıblar. 

Valyuta.az xəbər verir ki, bunu Ümumdünya Qızıl Şurasının (WGC) ilkin məlumatları sübut edir.

Hesabata görə, yazın ilk ayında dünya mərkəzi bankları 40,4 ton qızıl alıb, 24,7 ton satıb.

Özbəkistan ən çox metal satan ölkə olub. Martda ölkə ehtiyatlarını 10,9 ton azaldıb. Taylandın qızıl-valyuta ehtiyatları 9,6 ton, İordaniyanınki 3,7 ton azalıb.

Qızılın əsas alıcısı Türkiyə olub. Martın sonunda Ankara bu metaldan 14,1 ton alıb. Liderlər həmçinin Hindistan (5,1 ton), Çin (5 ton), Qazaxıstan və Sinqapur (hər biri 4,5 ton), həmçinin Rusiya (3,1 ton) olub.

Həftənin əvvəlində qızılın qiyməti FED-in sərt qərarları gözləntiləri ilə bir unsiya üçün 2320 dollardan aşağı düşüb. Cümə günü axşam saatlarında birjada metalın qiyməti bir unsiya üçün 2290 dollara düşüb.

Paşa Məmmədli