Ukraynanın DTEK enerji holdinqi zədələnmiş enerji bloklarının ən azı 50%-ni bərpa etmək niyyətindədir.

Valyuta.az xəbər verir ki, bu barədə şirkətin baş direktoru Maksim Timçenko bildirib.

"Zədələnmiş enerji bloklarının ən azı 50%-i yenidən şəbəkəyə qoşulacaq", - o deyib və Financial Times -a verdiyi şərhdə belə bir məqsədin yalnız enerji obyektlərinə yeni hücumlar olmadıqda real olduğunu vurğulayıb.

Timçenkonun sözlərinə görə, şirkət 2024-cü ilin oktyabrına qədər mümkün qədər çox enerji obyektini bərpa etməyi planlaşdırır. “Elektrik stansiyasını qısa müddətdə bərpa etmək mümkün deyil”, - o qeyd edib.

“Ukrenerqo”nun nümayəndəsi Mariya Tsaturyan “Financial Times”a verdiyi şərhdə vurğulayıb ki, kiçik yarımstansiyaları qoruyucu strukturlarla mühafizə etmək mümkündür, lakin bərpası “bir neçə ay, hətta illərlə davam edəcək böyük enerji obyektlərini əhatə etmək çox çətindir”.

Aprelin 3-də təsisçisi ən zəngin ukraynalı iş adamı Rinat Axmetov olan DTEK enerji holdinqi enerji sistemindəki vəziyyəti son dərəcə çətin adlandırıb. Mətbuat xidməti xatırladıb ki, martın 22 və 29-da baş verən hücumlardan sonra şirkət generasiya gücünün 80%-ni itirib, altı istilik elektrik stansiyasından beşi ciddi zədələnib. Aprelin 5-də “Bloomberg” agentliyinə müsahibəsində Timçenko təmir işlərinin dəyərinin 230 milyon dollar olacağını bildirib.

Martın 22 və 29-da Rusiya Müdafiə Nazirliyi Ukraynanın enerji obyektlərinə, hava hücumundan müdafiə və hərbi sənaye kompleksinə yüksək dəqiqlikli silahların tətbiqi də daxil olmaqla hücumlar barədə məlumat verib. Ukraynanın energetika naziri German Qaluşenkonun verdiyi məlumata görə, ölkədə generasiya qurğuları, elektrik enerjisinin ötürülməsi və paylanması sistemləri zədələnib. Bir sıra ərazilərdə fövqəladə hallar zamanı elektrik enerjisinin kəsilməsi qrafiki tətbiq edilib. 

Nicat