"QatarEnergy" Qətərdə qaz hasilatının artımına hazırlaşmaq üçün Asiya gəmi operatorları ilə dörd müqavilə üzrə 19 LNG daşıyıcısını icarəyə götürüb. 

Valyuta.az xəbər verir ki, bu barədə şirkətin mətbuat xidməti məlumat yayıb.

Qətərin energetika naziri Saad Şerida al-Xaabi bildirib ki, Çin şirkətləri CMES və "Shandong MarineGroup" hər biri altı gəmi təmin edəcək. Malayziyanın MISC şirkəti öz növbəsində üç gəmi, Cənubi Koreyanın "Hyundai Glovis" və Yaponiyanın "Kawasaki Kisen Kaisha" birgə müəssisəsi isə dörd qaz daşıyıcısı tədarük edəcək. Hər bir gəminin tutumu 174 min kubmetrdir. 

"Bloomberg" bildirir ki, Qətərin daha çox LNG daşıyıcısına ehtiyacı var, çünki ölkə resurs üzrə qlobal bazarda liderliyi bərpa etmək üçün Şimal Yatağının illik istehsal gücünü indiki 77 milyon tondan 2030-cu ilə qədər 142 milyon tona çatdırmağı hədəfləyir. Belə ki, ölkə 2030-cu ilə qədər mayeləşdirilmiş təbii qazın (LNG) istehsalını 85% artırmağı planlaşdırır.

London "ICE Futures" birjasının məlumatlarına görə, birinci rübdə Avropada qazın qiyməti 2023-cü ilin sonundakı səviyyələrlə müqayisədə 17% azalaraq 1 min kubmetr üçün təxminən 306 dollar təşkil edib. İllik ifadədə azalma 38% olub.

Paşa Məmmədli