Qərb ölkələri son vaxtlar Rusiyanın dondurulmuş aktivlərinin və ya ən azı faizlərin Ukraynaya ötürülməsini getdikcə daha çox müzakirə edirlər. 

Valyuta.az xəbər verir ki, Baş nazirin yenidənqurma üzrə müavini - icmaların, ərazilərin və infrastrukturun inkişafı naziri Aleksandr Kubrakov ən yaxşı halda Ukraynanın həmin aktivlərdən bu ilin sonunda istifadə edə biləcəyini deyib.

"ABŞ-ın mövqeyi var, Aİ-nin mövqeyi var - onlar bir qədər fərqlidir. Amma əminliklə deyə bilərik ki, bu il Rusiyanın dondurulmuş aktivlərinin istifadəsi ilə bağlı qərarlar müvafiq qanunvericilik səviyyəsində qəbul ediləcək. Biz artıq bunun baş verdiyini görürük”, - o RBC-Ukraynaya müsahibəsində izah edib.

Nazir deyir ki, ən yaxşı halda Ukrayna ilin sonunda bu vəsaitdən qismən də olsa istifadə edə biləcək. Ancaq real olaraq, "bu, artıq gələn il deməkdir".
2024-cü ilin mart ayının əvvəlində Böyük Britaniyanın xarici işlər naziri Devid Kemeron ölkəsinin Rusiya Mərkəzi Bankının dondurulmuş bütün aktivlərini Ukraynaya borc verməyə hazır olduğunu, Rusiyanın müharibə bitdikdən sonra Kiyevə təzminat ödəməyə məcbur olacağını əsas gətirərək bildirmişdi.

Sonradan İsveçrə Ukraynanın Rusiya aktivləri ilə maliyyələşdirilməsini müdafiə edib. Bu ölkənin Rusiya Mərkəzi Bankının ehtiyatlarında və aktivlərində 8 milyard dollardan çox var.

Nicat