Fələstinin radikal HƏMAS hərəkatı ilə silahlı münaqişə 2023-cü ilin dördüncü rübündə İsrailin ÜDM-nin illik ifadədə 19,4% azalmasına səbəb olub. 

Valyuta.az xəbər verir ki, bu barədə "The Times of Israel" (TOI) qəzeti Yaxın Şərq ölkəsinin Mərkəzi Statistika Bürosunun ilkin qiymətləndirməsinə istinadən məlumat yayıb.

Bu rəqəmi pandemiya dövrü ilə müqayisə etmək olar, o zaman İsrail ÜDM-i təxminən 30% azalıb. Ekspertlər 2023-cü ilin oktyabr-dekabr aylarında İsrail iqtisadiyyatının rüblük olaraq 5,2% daraldığını bildirib.

Bu vəziyyətə bir neçə amil səbəb olub. Xüsusilə, orduda xidmət etmək üçün işlərini tərk etməli olan 300 min ehtiyatda olan hərbçinin hərbi xidmətə çağırılması, eləcə də İsrailin Qəzza zolağı və Livanla həmsərhəd bölgələrindən təxliyə edilən 120 mindən çox vətəndaş üçün hökumətin dəstəyi ilə mənzil tikintisi və s.

Bundan əlavə, İordan çayının qərb sahilindən (HƏMAS-ın rəqibi olan Fəth hərəkatının nəzarətində olan ərazi-red.) fələstinli işçilərin İsrailə girişinə qoyulan məhdudiyyət iqtisadi vəziyyəti daha da pisləşdirib. Sonuncu vəziyyət ölkədə kadr çatışmazlığına səbəb olub.

Oktyabrın 7-də Fələstin radikal HƏMAS hərəkatının minlərlə silahlı tərəfdarının Qəzza zolağından İsrailə daxil olması, dinc əhaliyə hücum etməsi və 200-dən çox girovu qaçırması ilə Yaxın Şərqdə vəziyyət gərginləşib. Buna cavab olaraq İsrailin baş naziri Benyamin Netanyahu ölkənin müharibə vəziyyətində olduğunu bəyan edib. Quru əməliyyatı başladılıb, əməliyyatın məqsədi girovların qaytarılması və HƏMAS-ın tamamilə məhv edilməsidir.

Paşa Məmmədli