Yaponiya Beynəlxalq Əməkdaşlıq Bankı Qara Dəniz Ticarət və İnkişaf Bankına Ukraynanın inkişafı üzrə layihələrin həyata keçirilməsi üçün 150 milyon dollara qədər maliyyə vəsaiti ayıracaq. 

Valyuta.az xəbər verir ki, bunu Ukraynanın iqtisadiyyat naziri Yuliya Sviridenko deyib.

“Bu gün səhər Yaponiya Beynəlxalq Əməkdaşlıq Bankı ilə Qara Dəniz Ticarət və İnkişaf Bankı arasında 150 milyon dollara qədər iki mərhələli kreditin verilməsinə dair memorandum imzalanıb”, - Sviridenko bildirib.

Onun sözlərinə görə, pul kənd təsərrüfatı və nəqliyyat kimi sahələrdə struktur layihələrin hazırlanmasına sərf olunacaq.

Qeyd olunur ki, Qara Dəniz Ticarət və İnkişaf Bankı 1999-cu ildə Qara dəniz regionu ölkələrinin regional inkişafına və əməkdaşlığına yardım etmək məqsədilə yaradılıb. Onun üzvləri Türkiyə, Ukrayna, Azərbaycan, Albaniya, Ermənistan, Bolqarıstan, Yunanıstan, Gürcüstan, Moldova və Rumıniyadır.

Nicat