Polşa Ukrayna ərzaq məhsullarının öz ərazisindən tranzitinə nəzarəti gücləndirib və bu məqsədlə xüsusi “uçan briqadalar” təşkil edib. 

Valyuta.az xəbər verir ki, bunu Polşanın kənd təsərrüfatı və kənd inkişafı nazirinin müavini Mişal Kolodziejçak Polşa televiziyasına müsahibəsində deyib.

O, sərhəddə Ukrayna malları olan yüklərin plomblanmasına şəxsən nəzarət etdiyini vurğulayıb.

Polşada fermerlərin ümummilli etirazı cümə günü başlayıb. Onlar Ukrayna ilə sərhəddə yolları və keçid məntəqələrinə girişləri bağlayıblar. Fəallar bildiriblər ki, polşalı fermerlər Dorohusk keçid məntəqəsində Ukrayna yük maşınlarından taxıl boşaldıblar. 

Polşa ilə Ukrayna arasında münasibətlər Ukrayna taxılına qoyulan embarqoya görə mürəkkəbləşib. Ötən il sentyabrın 15-də Avropa Komissiyası Ukrayna kənd təsərrüfatı məhsullarının dörd növünün Avropa İttifaqının bir neçə sərhəd ölkəsinə idxalına məhdudiyyətləri uzatmamaq qərarına gəlib, lakin Kiyevi ixraca nəzarət tədbirləri tətbiq etməyə məcbur edib.

Nəticədə Macarıstan, Slovakiya və Polşa qadağanı birtərəfli qaydada uzadıb. Kiyev Ümumdünya Ticarət Təşkilatına şikayət edib. Hazırda Ukrayna taxılının yalnız üçüncü ölkələrə tranzit məqsədilə Polşaya idxalına icazə verilir.

Nicat