Qlobal iqtisadiyyat müxtəlif böhranlar qarşısında dayanıqlı olduğunu sübut etsə də, Yaxın Şərqdəki münaqişə əvvəllər gözləniləndən daha geniş nəticələrə səbəb ola bilər.

Valyuta.az DW-yə istinadla xəbər verir ki, bu sözləri Beynəlxalq Valyuta Fondunun baş icraçı direktoru Kristalina Georgiyeva Dubayda keçirilən Dünya Hökumət Sammitində deyib.

O qeyd edib ki, qlobal iqtisadiyyat müharibələr və geosiyasi böhranlar qarşısında “qeyri-adi dərəcədə” dayanıqlı olduğunu sübut edib və böyüməyə davam edəcək, lakin Yaxın Şərqdə münaqişənin genişlənməsi daha geniş nəticələrə səbəb ola bilər.

“Bu həddindən artıq qeyri-müəyyənlik əvvəlki şoklardan hələ də sağalmaqda olan iqtisadiyyatlar üçün çətinlikləri artırır. Münaqişənin daha da genişlənməsi iqtisadi ziyanı daha da çoxaldacaq”, - Georgiyeva bildirib.

Bundan əvvəl BVF-nin Yaxın Şərq və Şimali Afrikada iqtisadi artım proqnozunu 3,4 faizdən 2,9 faizə endirdiyi bildirilirdi. Təşkilat, çox sayda risk səbəbindən bölgənin perspektivlərinin son dərəcə qeyri-müəyyən olduğunu vurğulayıb. BVF Qəzza zolağında münaqişənin İsraillə qonşu olan ölkələrə yayılma təhlükəsini, həmçinin Qırmızı dənizdə gəmilərə hücumlar nəticəsində ticarətin daha da kəsilməsini əhatə edib.

Bundan əlavə, 2023-cü ilin dekabrında BVF-nin Direktorlar Şurası Ukrayna üçün növbəti tranşın 900 milyon dollar məbləğində ayrılmasını təsdiqləyib və EFF proqramı çərçivəsində ödənişlərin ümumi həcmini 4,5 milyard dollara çatdırıb.

Həmçinin dekabr ayında BVF Ukraynanın xarici maliyyələşdirilməsi üçün risklərdən danışıb.

BVF rəsmisi Julie Kozak bildirib ki, Ukraynanın 2024-cü ildə təxminən 42 milyard dollar maliyyələşdirməyə ehtiyacı olacaq. Bu məbləğin ən azı 32 milyard dolları rəsmi donor dəstəyindən olmalıdır.

Nicat