Moldova Rusiyanın "Qazprom" şirkətindən Dnestr çayının sağ sahili üçün qaz alışını bərpa edə bilər. 

Valyuta.az xəbər verir ki, bu barədə Moldova Energetika Nazirliyinin rəhbəri Viktor Parlik məlumat verib.

Onun sözlərinə görə, yanacağın qiyməti sərfəli olarsa, bu, mümkün olacaq.

Keçən il Moldova Rusiya qazını birjada daha ucuz almaq mümkün olduğu üçün sağ sahil üçün almayıb. Nazir deyib ki, bunun sayəsində respublika 60 milyon avroya yaxın qənaət edib. O, əmin edib ki, “Qazprom”dan alqı-satqıya heç bir siyasi qadağa yoxdur.

“Əgər qiymət daha yaxşı olarsa, biz “Qazprom”dan ala bilərik. Belə bir ssenari istisna edilmir. Bəs birjada qiymət daha sərfəli olarsa, o zaman artıq ödəməyə nə ehtiyac var? Biz ilk növbədə qiymətdən çıxış edirik ki, istehlakçı üçün tarif aşağı olsun”, deyə Viktor Parlikov vurğulayıb.

2021-ci ilin oktyabrında Moldova və “Qazprom” 3,3 milyard kubmetr qaz tədarükü üçün müqavilə imzalayıb. Onun şərti 709 milyon dollarlıq borcun qaytarılması idi. Moldova payızda Rusiya tərəfinin razılaşmadığı cəmi 8,6 milyon dolları ödəməyə hazır olduğunu bəyan edib.

Paşa Məmmədli