ABŞ Neft Sənayesi Assosiasiyasının prezidenti Tim Stüart "Fox News"a bildirib ki, ölkənin strateji neft ehtiyatları son 30 ildə ilk dəfə olaraq ən aşağı səviyyəyə düşüb.

Valyuta.az xəbər verir ki, ABŞ prezidenti Co Baydenin komandası yanacağın qiymətinin artmasının qarşısını almaq üçün il ərzində fövqəladə ehtiyatın 40%-ni sərf edib. Bu, digər şeylərlə yanaşı, təbii fəlakət və ya müharibə vəziyyətində ölkənin nə etməli olduğunu sual altına alan respublikaçıların kəskin tənqidinə səbəb olub.

Qeyd edilir ki, ehtiyatların sürətlə tükənməsi gələcəkdə neftin qiymətinin daha da artması ilə nəticələnəcək, fiziki tədarükün pozulması riskləri yaradacaq və inflyasiyanın yeni mərhələsini təhdid edəcək.

Bundan əvvəl ABŞ-da kommersiya neft ehtiyatlarının (strateji ehtiyat istisna olmaqla) dekabrın 1-də başa çatan həftə ərzində 4,6 milyon barel azaldığı bildirilmişdi. "DailyFX" portalının analitikləri ehtiyatların cəmi 1,4 milyon barel azalacağını gözləyirdilər. Ölkənin ən böyük Kuşinq terminalında neft ehtiyatları 27,7 milyon bareldən 29,6 milyon barrelə yüksəlib.

Paşa Məmmədli