Hindistan hakimiyyəti 2024-cü ilin yazında ölkədə keçiriləcək ümumi seçkilər ərəfəsində artan daxili qiymətlərin qarşısını almaq üçün Rusiyadan 1 milyon ton buğda idxal etməyi düşünür. 

Valyuta.az xəbər  verir ki, bu barədə The New Indian Express məlumat yayıb .

"Rusiya buğdası digər ölkələrlə müqayisədə daha yaxşı və ucuzdur. Hindistan seçkilər ərəfəsində daxili bazarı stimullaşdırmaq üçün Rusiyadan təxminən 1 milyon ton buğda idxalına icazə verə bilər", - mənbələrdən biri bildirib.

Hələlik bu məlumatın rəsmi təsdiqi yoxdur. Yayda Hindistan mediası Hindistanın Rusiya ilə 8-9 milyon ton buğda almaq üçün danışıqlar apardığını yazmışdı.

Nəşrin məlumatına görə, Hindistan hökuməti idxal rüsumlarının indiki 40%-dən 15-20%-ə qədər azaldılması imkanını nəzərdən keçirir. Rüsumun azaldılması dekabrın sonuna kimi məlum olacaq son buğda əkin sahəsindən asılı olacaq.

Hindistanın kənd təsərrüfatı sənayesi iki il dalbadal əlverişsiz hava şəraiti ilə üzləşib və bu, ölkənin buğda ehtiyatlarına təsir edərək qiymətləri artırıb. Bu il sinoptiklər əkin mövsümünün uğursuz keçməsi ehtimalını da qeyd edirlər.

Hindistanda ümumi seçkilər 2024-cü ilin yazında keçiriləcək. Hakim Hindistan Xalq Partiyası baş nazir Narendra Modinin hakimiyyətinin üçüncü müddətə uzadılmasına nail ola bilər. Ötən həftə sonu kənd təsərrüfatı ştatlarında Madhya Pradeş, Racastan və Çhattisqarhda keçirilən regional seçkilərin nəticələri partiyanın hakimiyyətdəki lider mövqeyini nümayiş etdirib.

Nicat