Beynəlxalq reytinq agentliyi Moody's Çinin suveren istiqrazları üzrə proqnozunu mənfiyə endirib. 

Valyuta.az xəbər verir ki, bu barədə Bloomberg məlumat yayıb.

Nəşr yazır ki, bu, Pekinin daşınmaz əmlak bazarında böhran fonunda iqtisadiyyatı dəstəkləmək üçün büdcə xərclərini artırması ilə bağlıdır. Bu il Çinin büdcə kəsiri son 30 ildə ilk dəfə ÜDM-in 3%-i həddini keçəcək və 3,8% təşkil edəcək. Bu, yerli hakimiyyət orqanlarına və şirkətlərə kömək etmək üçün genişmiqyaslı fiskal stimullardan istifadə edilməsi ilə bağlıdır.

Bundan əlavə, hakimiyyət dövlət istiqrazlarının buraxılışı üzrə limiti 1 trilyon yuan artırıb. Bu borc vəsaitləri də iqtisadiyyatın stimullaşdırılmasına yönəldiləcək. Nəticədə 2022-2023-cü illərdə Çinin ümumi dövlət borcu kəskin artacaq.

Bu cür tədbirlər dünyanın ikinci iqtisadiyyatının inkişaf perspektivləri ilə bağlı investorlar arasında narahatlıq yaradır. Onların fikrincə, borc maliyyələşdirməsindən həddindən artıq istifadə Çin iqtisadiyyatı üçün risklərlə doludur.

Moody's Çinin uzunmüddətli reytinqini A1 səviyyəsində saxlasa da, 1989-cu ildən bəri ilk dəfə olaraq onun proqnozunu sabitdən mənfiyə endirib. Agentlik sonuncu dəfə Çinin suveren reytinqini 2017-ci ildə aşağı salıb.

Nicat