Tayvanda hərbi münaqişənin qlobal iqtisadiyyata vurduğu ziyan 2 trilyon dolları keçə bilər. 

Valyuta.az xəbər verir ki, bu barədə NATO-nun keçmiş baş katibi Anders Foq Rasmussen Britaniyanın Financial Times (FT) nəşri üçün məqaləsində bildirib.

“Tayvan dünyadakı yarımkeçiricilərin 60%-dən çoxunu və ən qabaqcıllarının təxminən 90%-ni istehsal edir. Pekin bu hasilata nəzarət etmiş olsaydı, bu, qlobal iqtisadiyyatı əzər, Avropa hökumətləri və firmalarını zəif vəziyyətə salardı”, - nəşr yazır.

NATO-nun keçmiş baş katibi aydınlaşdırıb ki, qlobal dəniz ticarətinin 60%-dən çoxu Cənubi Çin dənizindən keçir və bu regionda hərbi münaqişə qlobal iqtisadiyyat üçün fəlakətli olardı.

Rasmussenin sözlərinə görə, Aİ liderləri “açıq və yekdilliklə bəyan etməlidirlər ki, Çinin Tayvanda status-kvonu güc yolu ilə dəyişdirmək cəhdi çox baha başa gələcək”. 
O , Tayvana hərbi dəstəyi gücləndirən və eyni zamanda ölkə rəhbərliyinin hücum halında adanı müdafiə etməyə hazır olması barədə bəyanatlar verən ABŞ-ı nümunə kimi göstərib.

Tayvan 1949-cu ildə Çindən ayrılıb. Bununla belə, Çinin hazırkı konstitusiyasına görə, Tayvan ÇXR-in bir hissəsidir.

Dekabrın 3-də amerikalı general Braun Çin və Tayvan arasında mümkün münaqişədən narahat olduğunu bildirib.

Noyabrın 30-da Tayvan prezidenti Çinin niyə tezliklə adanı işğal etməyəcəyini izah edib.

Noyabrın 9-da bildirilib ki, Çin Tayvana qarşı güc tətbiqini istisna etmir.

Nicat