Hubble Kosmik Teleskopu bir həftə ərzində üçüncü dəfə "təhlükəsiz rejimə" keçib.

Valyuta.az xəbər verir ki, 1990-cı ildə 15 illik xidmət müddəti gözlənilməklə işə salınan və sonuncu dəfə 2009-cu ildə kosmos gəmisi tərəfindən xidmət göstərilən bu köhnə, üzən rəsədxana zaman-zaman təmirə ehtiyac duyur. Bu dəfə NASA kosmik teleskopun giroskop problemi səbəbindən təhlükəsiz rejimə keçdiyini açıqlayıb. Kosmik agentlik əməliyyatların yenidən başlaması üçün çalışdığını bildirdi.

Problemlərin noyabrın 23-də başladığı və "Hubble"ın hələ də onlayn olmadığı bildirilib. Teleskop əvvəlki günlərdə də iki dəfə eyni problemlə qarşılaşmış və sonra təhlükəsiz rejimə salınmışdı. NASA "Hubble"ın digər hissələrinin işlək vəziyyətdə olduğunu və alətlərinin sabit qaldığını da bildirib. Teleskop tək bir giroskopla da işləyə bilər, lakin bu halda daha az səmərə verəcək.

2009-cu ildə beşinci və sonuncu səfəri zamanı teleskop texniki xidmət üçün götürüləndə astronavtlar "Hubble"a 6 yeni giroskop quraşdırmışdılar. Onlardan dördü hələ də işləyir.

Giroskoplar teleskopu kosmosdakı hədəfə yönəltmək üçün istifadə olunur. Bu alətlər "Hubble"a kosmosda hərəkət istiqamətini müəyyənləşdirməyə imkan verir. NASA rəsmiləri "Hubble"ın, "James Webb" və digər teleskoplarla birlikdə 10 və bəlkə də 20 il ərzində fəaliyyətini davam etdirəcəyinə inandıqlarını bildirib.

Xidmətini başa vurduqdan sonra "Hubble" Yer atmosferinə daxil olacaq. Lakin bunun 2030-cu ildən tez olmayacağı gözlənilir. "Hubble"a onu aşağı itələyən, idarə olunan şəkildə Sakit Okeana düşməsini və ya daha yüksək orbitə çıxarmasını təmin edən bir hərəkət sistemi əlavə ediləcəyi gözlənilir.

Elmir