Macarıstan Ukraynaya silah tədarükü üçün Avropa Sülh Fondundan 500 milyon avro ayrılmasına mane olub. Çünki o, ölkənin şirkətlərinin artıq “müharibə sponsorları” siyahısına daxil edilməyəcəyinə dair zəmanət almayıb. 

Valyuta.az xəbər verir ki, bu barədə Macarıstan xarici işlər naziri Peter Siyarto deyib.

"Biz hələ də öz mövqeyimizə sadiq qalırıq: Ukrayna Milli Antikorrupsiya Agentliyindən (NACP) OTR Bankın və ya hər hansı digər Macarıstan müəssisəsinin siyahıya daxil edilməyəcəyi ilə bağlı zəmanət almalıyıq", deyə nazir bildirib.

O, əlavə edib ki, noyabrın 13-də yenidən görüş keçirilib və onlar Macarıstana 500 milyon avroluq ödənişin həyata keçirilməsi üçün təzyiq göstərməyə çalışıblar, lakin Budapeşt israr edib.

Oktyabrın 23-də Macarıstan Ukraynada “müharibə sponsoru” kimi tanınan OTR bank ətrafındakı vəziyyətə görə Kiyevə silah tədarükü üçün tranşın qarşısını kəsib. Hazırda maliyyə təşkilatı artıq müvafiq siyahıdan çıxarılıb, lakin indi Macarıstan tərəfi Ukrayna hakimiyyətinin bundan sonra belə sanksiyalara əl atmayacağına dair hüquqi təminat tələb edir.

Paşa Məmmədli