Yaponiya hökuməti ABŞ hakimiyyətinin Yaponiya tərəfinin iştirak etdiyi “Arctic LNG 2” layihəsinə qarşı sanksiyaların tətbiqi ilə bağlı vəziyyəti öyrənəcək. 

Valyuta.az xəbər verir ki, bu barədə Tokioda jurnalistlərə iqtisadiyyat, ticarət və sənaye naziri Yasutoşi Nişimura bildirib.

"Biz maraqlı tərəflərlə əməkdaşlıqda bu məsələni diqqətlə öyrənməyi planlaşdırırıq", - Nişimura bildirib. O, həmçinin qeyd edib ki, Arctic LNG 2-yə qarşı sanksiyalar müəyyən təsir göstərəcək və buna görə də Yaponiya “sabit enerji təchizatında fasilələrin qarşısını almaq üçün G7 ölkələri ilə qarşılıqlı əlaqə qurmaq niyyətindədir”.

Noyabrın 2-də ABŞ Maliyyə Nazirliyi mayeləşdirilmiş təbii qaz zavodunun tikintisi layihəsini həyata keçirən “Arctic LNG-2” MMC-ni sanksiyalar siyahısına daxil edib. Nazirlik həmçinin Arctic LNG 2 ilə əməliyyatların tamamlanması üçün 31 yanvar 2024-cü il tarixini təyin edib.

“Arctic LNG 2” layihəsinin iştirakçıları Novatek (60%), TotalEnergies (10%), CNPC (10%), CNOOC (10%) və Yaponiya konsorsiumu Japan Arctic LNG-dir. Layihə gücü ildə 6,6 milyon ton olan mayeləşdirilmiş təbii qazın istehsalı üzrə üç mərhələnin tikintisini nəzərdə tutur.

Rusiyanın “Saxalin-1” və “Saxalin-2” layihələrində iştirakını davam etdirən Yaponiya tərəfi onların ölkənin enerji təhlükəsizliyinin təmin edilməsində əhəmiyyətini dəfələrlə vurğulamışdır. Saxalin-2 layihəsindən dünyanın ən böyük LNG idxalçısı olan Yaponiya bütün alınmış mayeləşdirilmiş qazın təxminən 9%-ni alır. Yaponiyanın Mitsui və Mitsubishi şirkətləri müvafiq olaraq 12,5% və 10% paya sahibdirlər.

Rusiyanın Yaponiyadakı keçmiş səfiri Mixail Qaluzin qeyd edib ki, Rusiya “Arctic LNG 2”-dən Yaponiyaya 2023-cü ildə LNG tədarük etməyə başlaya bilər. Onun sözlərinə görə, layihənin tammiqyaslı işə salınmasından sonra Yaponiya ondan ildə təxminən 2 milyon ton LNG ala biləcək. İndi Yaponiya Rusiyadan ildə orta hesabla 5-6 milyon ton LNG idxal edir.

Nicat