"Bu il Avropa əvvəlki illərlə müqayisədə xeyli az Rusiya qazı alıb. Amma bu, Moskvaya qarşı sanksiyalarla bağlı deyil".

Valyuta.az xəbər verir ki, bu sözləri Lenta.ru-ya Rusiya Federasiyası Hökuməti yanında Maliyyə Universitetinin eksperti, Milli Enerji Təhlükəsizliyi Fondunun aparıcı analitiki İqor Yuşkov deyib.

“Rusiya qazının, istər boru kəməri, istərsə də mayeləşdirilmiş təbii qazın (LNG) alınmasını qadağan edən heç bir sanksiya yoxdur. Dövlətlər bu məsələni tənzimləmir - nə milli hökumətlər, nə də çoxmillətli struktur kimi Brüssel. Sırf ora qaz çatdıra bilmədiyimiz üçün tədarük həcmimiz azalıb”, deyə analitik izah edib.

O, partlayışlardan sonra “Şimal axını” qaz kəmərlərinin işləməməsinə aydınlıq gətirib. Öz növbəsində, Polşanın "Qazprom"a məxsus Yamal-Avropa qaz kəmərinin bir hissəsini milliləşdirməsi səbəbiylə işləmir. Ukrayna əsas yanacaq tədarükü yollarından birini Luqansk Xalq Respublikası ərazisindən keçdiyi üçün bağlayıb".

İndi Rusiya qazını Avropaya çatdırmağın iki yolu var - Kiyevdən keçən ikinci marşrut və “Türk axını” kəməri. Analitikin fikrincə, hətta bu kanallar da tam gücü ilə işləmir. Yuşkovun proqnozlarına görə, 2023-cü ilin sonuna qədər Rusiya qazının Avropaya nəqlinin həcmi 20-25 milyard kubmetrdən çox olmayacaq.

Paşa Məmmədli