Ukrayna Polşaya diplomatik nota göndərərək Polşa daşıyıcılarının ümumi sərhədi bağlamasının qarşısını almaq istəyib. 

Valyuta.az xəbər verir ki, Ukraynanın Polşadakı səfiri Vasil Zvariçin Ukrinform-a açıqlamasında qeyd etdiyi kimi, bu, hər iki ölkənin maraqlarına zərər verə bilər.

Zvariçin sözlərinə görə, genişmiqyaslı müharibə şəraitində nəzarət-buraxılış məntəqələrinin yükü daha da artıb, ona görə də Polşa daşıyıcılarının bu cür hərəkətləri yersizdir.

“Ümid edirik ki, Polşa hakimiyyəti sərhədi bağlamamaq üçün potensial etirazçılarla anlaşma əldə edə biləcək. Axı etirazçıların keçid məntəqələrində nəqliyyatın qarşısını almaqla bağlı bu cür hədələri Polşanın, eləcə də Ukraynanın bərpası layihələrində iştirak edən və ya iştirak etmək niyyətində olan polşalı sahibkarların imicinə heç də kömək etmir”, - Zvariç vurğulayıb.

Dövlət Sərhəd Xidmətinin nümayəndəsi Andrey Demçenkonun sözlərinə görə, ukraynalılar Polşa daşıyıcılarının tətilləri səbəbindən noyabrın 3-dən sonra Polşa ilə sərhədi keçərkən müəyyən çətinliklərlə üzləşə bilərlər.

Daşıyıcılar iki ay tətil etməyi planlaşdırır. Xüsusilə, Ukrayna daşıyıcılarına icazələrin qaytarılmasını tələb edirlər.

Tətillərə səbəb kimi Ukrayna ilə Aİ ölkələri arasında beynəlxalq daşımaların liberallaşdırılmasından sonra həddindən artıq rəqabət olduğu bildirilir.

Nicat