İqtisadçılar İsrail və HƏMAS arasında münaqişənin bütün Yaxın Şərq regionunda cilovlana bilməyəcəyi təqdirdə qlobal iqtisadiyyat üçün ciddi nəticələrdən ehtiyat edirlər. 

Valyuta.az xəbər verir ki, "Economist Intelligence Unit"in Yaxın Şərq və Afrika regionu üzrə direktoru Pat Takerin sözlərinə görə, Yaxın Şərqdəki istənilən münaqişə regionun enerji təchizatçısı və dəniz ticarət yolları üçün mərkəz kimi əhəmiyyətinə görə qlobal iqtisadiyyata təsir edir.

“Sinay yarımadası və Süveyş bölgəsində hərbi əməliyyatların hər hansı genişlənməsi dünya ticarətinin demək olar ki, 15%-nin, neftin 45%, neft məhsullarının 9% və LNG tankerlərinin 8%-nin Süveyş kanalından keçdiyi enerji və digər malların ticarətinə təsir riskini artırır”, - ekspert izah edib. Onun hesablamalarına görə, neftin qiymətinin qalxması və qlobal iqtisadiyyat üçün nəticələri münaqişənin coğrafi baxımdan nə dərəcədə məhdudlaşdırıla biləcəyi ilə düz mütənasib olacaq.

Geniş regional eskalasiya halında, Brent neftinin qiymətləri uzun müddət ərzində bir barel üçün 100 dollardan yuxarı qalacaq ki, bu da Takerin təxminlərinə görə, “daha yüksək qlobal inflyasiya, aşağı iqtisadi artım” və “faktiki olaraq tənəzzül şərtləri” deməkdir. S&P Global Ratings-in inkişaf etməkdə olan bazarlar üzrə baş iqtisadçısı Elijah Oliveros-Rosenin sözlərinə görə, inflyasiya təzyiqi səbəbindən xüsusilə Çili, Türkiyə, Tayland, Filippin və Hindistan yüksək neft qiymətlərindən əziyyət çəkəcək. İsveçrə bankı J. Safra Sarasin-in səhm strateqi Wolf von Rothberg hesab edir ki, Səudiyyənin neft tədarükü ilə bağlı qeyri-müəyyənliyinin artması ilə enerji qiymətləri Ukraynada münaqişənin başlanğıcında olduğu kimi kəskin arta bilər. Onun sözlərinə görə, o zaman neftin qiyməti “iki həftə ərzində 30% artıb, sonra isə münaqişə başlamazdan əvvəlki qiymətdən təxminən 15% yüksək olub”.

Nicat