Çində polis qanunsuz şirkətə qarşı keçirdiyi əməliyyat zamanı minə yaxın pişiyi donuz və ya qoyun əvəzinə kəsilib satılmaqdan xilas edib.

Valyuta.az xəbər verir ki, polis Zanqjiaqanq şəhərində dayandırılan bir yük maşınının yük yerində təxminən min pişik tapdıqlarını açıqlayıb. Səlahiyyətlilərin açıqlamasına görə pişiklər tapılmasaydı, kəsim məntəqələrinə aparılaraq orada kəsiləcəkdi. Ətləri isə donuz və quzu əti adı ilə kabab, yaxud kolbasa üçün satılacaqdı. Xəbərdə məsələ ilə bağlı həbslərin olub-olmadığı bildirilməyib və pişiklərin yaxınlıqdakı Tayçanq sığınacağına aparıldığı bildirilib. Pişiklərin ev heyvanları və ya sahibsiz olduqları barədə açıqlama verilməyib. 

Pişikləri isə çin heyvansevərləri aşkarlayıb. Fəallar ilk olaraq Zanqjianqda qəbirstanlığın yaxınlığında mismarlanmış taxta qutuların içərisində çoxlu sayda pişik saxlanıldığını aşkarlayıb. Daha sonra fəallar ətrafda altı gün boyunca axtarış aparıb. Nəhayət içi pişiklə dolu olan qutular yük maşını vasitəsilə kəsim məntəqəsinə aparılarkən polis tərəfindən saxlanılıb. 

Fəalların fikrincə, pişik ətinin bir kiloqramı qoyun və ya donuz əti kimi təxminən dörd dollara satılır. Hər pişik emaldan sonra 4-5 kilo gəlir. Çində mal-qaranı və nəsli kəsilməkdə olan heyvanları qoruyan qanunlar var. Amma ölkədə ev heyvanlarına, sahibsiz pişiklərə və itlərə qarşı zorakılıq üçün konkret qanunlar yoxdur. Çində heyvan və ətraf mühitin müdafiəsi fəalları uzun müddətdir ki, ənənəvi tibbi müalicələrdə heyvan ətlərinin istifadəsinə qarşı mübarizə aparırlar.

Digər tərəfdən Yulində hər il keçirilən it əti festivalına qarşı reaksiyalar günü-gündən artmaqdadır.

Elmir