ABŞ və Avropa İttifaqı Ukrayna ilə bağlı bəyanatında ölkə iqtisadiyyatının çökməsi riskləri barədə xəbərdarlıq edib. 

Valyuta.az xəbər verir ki, bu barədə ABŞ-Avropa İttifaqı sammitinin yekunları üzrə yayılan bəyanatda deyilir. 

Bəyanatda ən böyük bölmə Ukraynaya həsr olunub - üç saatlıq sammitin yekunları üzrə dərc olunmuş səkkiz səhifəlik sənəddən bir yarım səhifəsi.

"Biz Rusiyanın Ukrayna iqtisadiyyatının çökməsinə səbəb olmamasını təmin etmək üçün təcili tədbirlər görmək zərurətini qəbul edirik", deyə sənəddə qeyd edilir.

Həmçinin bildirib ki, Birləşmiş Ştatlar və Aİ yardımlarının Kiyevin bütün ehtiyaclarına cavab verməsini təmin etmək üçün səylərini gücləndirmək niyyətindədir. ABŞ və Aİ eyni zamanda Ukraynanın enerji sektorunu Avropa standartlarına uyğun qorumaq, təmir və bərpa etmək üçün birgə işləmək niyyətindədir.

Bəyanatda Ukraynanın hərbi səylərinə dair yeganə istinad ondan ibarətdir ki, Kiyev özünü müdafiə etmək hüququna malikdir, Brüssel və Vaşinqtonun hərbi yardımla bağlı mövqeyi sarsılmaz olaraq qalır.

Birləşmiş Ştatlar və Aİ, həmçinin Rusiya Federasiyasını bütün qoşunlarını və hərbi texnikasını Ukraynanın beynəlxalq səviyyədə tanınmış ərazisindən dərhal çıxarmağa, habelə Ukraynaya bütün dəymiş ziyanı ödəməyə çağırır, sanksiyaları sərtləşdirəcəyini vəd edir. Rusiyanın dondurulmuş aktivlərindən gəlirlərin Kiyevə köçürülməsinin rəsmi qanuni yollarının axtarıldığı da bildirilir.

Paşa Məmmədli