Beynəlxalq Enerji Agentliyinin məlumatına görə, Avropada qazın qiyməti 2027-ci ilə qədər yüksək qalacaq. Orta hesabla, 1000 kubmetr üçün ən azı 450 dollar təşkil edəcək.

Valyuta.az xəbər verir ki, bu barədə “Vedomosti” məlumat yayıb.

Agentliyin hesabatında qeyd olunur ki, qlobal və Avropa qaz bazarlarında tələb və təklif tədricən bərabərləşir. Lakin 2024-cü ildə tədarükün məhdud olması fonunda qiymətin təxminən 10% - 1000 kubmetr üçün 500-535 dollara qədər artacağı gözlənilir.

2025-2026-cı illərdə yeni LNG zavodlarının istifadəyə verilməsi sayəsində qiymətlər 1000 kubmetr üçün 464 dollara düşəcək. Bu, 2016-2020-ci illərin səviyyəsindən iki dəfə çoxdur. 

Oktyabrın 13-də Aİ-də qaz saxlama qabiliyyətinin 97% olmasına baxmayaraq, spot qiymətlər 1000 kubmetr üçün 600 dolları ötüb. Avstraliya LNG zavodlarında tətil təhlükəsi və Avropada külək istehsalının azalması fonunda artım davam edir.

BEA hesab edir ki, yüksək qiymətlər Avropada qaza tələbatın azalmasına səbəb olacaq. 2022-ci ildə 14% azalıb, 2023-cü ildə isə daha 7% - 489 milyard kubmetrə qədər azala bilər. Ekspertlər razılaşırlar ki, qiymətlərin normallaşdırılması qlobal LNG istehsalının artması səbəbindən 2026-cı ildən tez mümkün olmayacaq.

Paşa Məmmədli