Türkiyənin diplomatik dairələrindəki mənbədən alınan məlumata görə, yaxın vaxtlarda Türkiyədə beynəlxalq qaz qovşağının yaradılması üçün yol xəritəsi nəzərdən keçirilə və təsdiq oluna bilər. 

Valyuta.az xəbər verir ki, bu barədə TASS yazıb.

Hazırda bu məsələ ilə bağlı Türkiyənin Energetika Nazirliyi ilə “Qazprom” arasında danışıqlar aparılır və yol xəritəsinin imzalanmasından sonra tərəflərin onun həyata keçirilməsinə başlayacağı gözlənilir. Konkret tarixləri söyləmək hələ ki çətindir.

Bildirilib ki, Azərbaycan da Türkiyədə qaz qovşağının reallaşdırılmasında iştirak etməyə hazırdır.

Bundan əvvəl Türkiyə Rusiyaya qaz borcu ilə bağlı məlumatları təkzib etmişdi. Türkiyənin enerji və təbii sərvətlər naziri Alparslan Bayraktar bildirib ki, Ankara Rusiyadan qaz üçün “daha münasib qiymətlər” alacağını gözləyir və “Qazprom”la qarşılıqlı anlaşmaya ümid edir.

Moskva və Ankara qazın qiymətinin maksimum səviyyəsi ilə bağlı razılığa gəliblər, ona görə də Avropanın ən böyük TTF qovşağında qiymətlərin dəyişməsi halında Türkiyə tərəfi kəskin qiymət artımlarından qorunur. Nazir etiraf edib ki, belə bir şərt endirim sayıla bilər.

Nicat