Tel-Əviv və Fələstinin radikal HƏMAS hərəkatı arasındakı münaqişə ABŞ-ın Fələstini dəstəkləyən İrana qarşı daha sərt sanksiyalarına səbəb ola, Səudiyyə Ərəbistanı ilə İsrail arasında münasibətlərin normallaşması perspektivlərini təhlükə altına sala və “Yaxın Şərqdə münaqişəni genişləndirə bilər”. 

Valyuta.az "Politico"ya istinadla xəbər verir ki, bu nəticələrdən hər hansı biri öz növbəsində yanacağın qiymətində kəskin sıçrayışa səbəb ola bilər.

"Lipow Oil Associates" enerji konsaltinq şirkətinin rəhbəri Endi Lipounun fikrincə, qiymətlərin artması ehtimalı "münaqişənin hazırda neft tədarükünə təsir etdiyi üçün deyil, digər oyunçuların, məsələn, HƏMAS-ı dəstəkləyən İranın da cəlb oluna biləcəyi ilə bağlı narahatlıqlara görə ola bilər”.

Bildirilir ki, bəzi enerji sənayesi analitikləri ABŞ prezidenti Co Baydenin həqiqətən də İrana qarşı sanksiyaları sərtləşdirəcəyinə inanırlar. Mütəxəssislər hesab edirlər ki, o zaman "neftin dünya qiymətləri simvolik göstəricini 100 dollar/barel həddini keçə bilər", - nəşr yazır.

Yaxın Şərqdə vəziyyətin yeni gərginləşməsi oktyabrın 7-də Qəzza zolağından HƏMAS yaraqlılarının İsrail ərazisinə hücumu ilə başlayıb. HƏMAS hücumu İsrail hakimiyyətinin Qüdsdəki Məbəd dağındakı Əl-Əqsa məscidinə qarşı hərəkətlərinə cavab olaraq əsaslandırır. İsrail müharibəyə hazır vəziyyətə keçdiyini və Qəzza zolağının tam blokadaya alındığını elan edib.

“The Wall Street Journal” yazır ki, münaqişənin inkişafının yeni mərhələsi Səudiyyə Ərəbistanı ilə İsrail arasında münasibətlərin yaxşılaşması ehtimalını təhdid edir. Oktyabrın 8-də İsrailin BMT-dəki daimi nümayəndəsi Gilad Erdan bildirib ki, HƏMAS-ın yəhudi dövləti ərazisinə hücumu və Qəzza zolağında vəziyyətin gərginləşməsi səbəbindən ölkə hakimiyyəti Ər-Riyadla münasibətlərin normallaşdırılmasından imtina etmək niyyətində deyil. Sentyabrın 21-də Səudiyyə Ərəbistanının vəliəhd şahzadəsi Məhəmməd bin Salman əl "Səud Fox News" telekanalına müsahibəsində deyib ki, krallıq İsraillə münasibətləri normallaşdırmağa “hər gün daha da yaxınlaşır”. Eyni zamanda o vurğulayıb ki, Fələstin məsələsi Ər-Riyad üçün əsas olaraq qalır. 

Nicat