2023-2024-cü illərin qışında Böyük Britaniya soyuq qış və artan istilik tarifləri fonunda ağır inflyasiya ilə üzləşəcək. 

Valyuta.az xəbər verir ki, bu barədə "Express" nəşri yazır.

Nəşrin yazdığına görə, bununla bağlı baş nazir Rişi Sunak Britaniyanın neft, qaz sənayesi və bərpa olunan enerjiyə yeni investisiyalar barədə açıqlama verməyə hazırlaşır.

"Rişi Sunak Vladimir Putin kimi tiranların bir daha heç vaxt enerjidən şantaj silahı kimi istifadə edə bilməməsini təmin etmək üçün Britaniyanın neft, qaz və bərpa olunan enerji sənayesinə yeni sərmayə qoyacağını elan etməyə hazırlaşır", deyə nəşr qeyd edir.

Jurnalistlər xatırladıblar ki, BVF-nin məlumatına görə, Böyük Britaniyada ev təsərrüfatlarının büdcəsinə enerji qiymətlərinin artması “Qərbi Avropanın hər hansı bir ölkəsindən daha çox” zərbə vurub. Bunun səbəblərindən biri 2017-ci ildə ölkədəki qaz anbarlarının bir hissəsinin bağlanmasıdır.

Əvvəllər bildirilirdi ki, Britaniyanın qaz alışına xərcləri 2022-ci ildə 50-60 milyard funt-sterlinq artıb.

Eyni zamanda, əgər bərpa olunan enerji mənbələrindən istifadə edilməsəydi, Britaniyanın ümumi xərcləri daha da arta bilərdi. ECIU analitiklərinin araşdırmasına görə, onların köməyi olmasaydı, Birləşmiş Krallığın xərcləri daha 20 milyard funt-sterlinq (təxminən 24 milyard dollar) artıq olacaqdı.

Paşa Məmmədli