BMT-nin baş katibi Antonio Quterreş Rusiya prezidenti Vladimir Putinin yaxın bir neçə ay ərzində Afrika ölkələrinə 50 min ton taxılın pulsuz çatdırılmasını təşkil etmək təklifini tənqid edərək, bu “bir ovuc ianə”nin taxıl müqaviləsinin başa çatmasının dramatik nəticələrini aradan qaldıra bilməyəcəyini deyib..

Valyuta.az Reuters-ə istinadla xəbər verir ki , Rusiya “taxıl müqaviləsi”ndən və Ukrayna limanlarına hücumlarından sonra dünya buğdasının qiyməti son 10 gündə təxminən 10% bahalaşıb.

"Milyonlarla ton taxılın bazardan çıxarılmasının ... daha yüksək qiymətlərə səbəb olacağı aydındır. Beləliklə, bəzi ölkələrə bir ovuc ianə bu dramatik təsiri düzəldə bilməyəcək", - Quterreş deyib.

BMT Baş katibinin dediyi kimi, qiymətlərin hər hansı bir artımı indi "hamı tərəfindən, hər yerdə ödəniləcək" - inkişaf etməkdə olan ölkələr, həssas orta gəlirli insanlar və hətta inkişaf etmiş ölkələr.

“Putin Afrikaya pulsuz taxılla rüşvət verməyə çalışıb”, - "Unian" yazıb.

Bundan əvvəl Sankt-Peterburqda keçirilən Rusiya-Afrika forumunda Afrika ölkələrinin nümayəndələri Putini “taxıl sazişi”nə qayıtmağa və Afrikaya taxıl tədarükünü davam etdirməyə çağırıblar.

Buna cavab olaraq Putin Rusiyanın bir daha taxıl sazişinə qoşulmayacağını bildirib, bunun əvəzinə yaxın bir neçə ay ərzində Burkina Faso, Zimbabve, Mali, Somali, Mərkəzi Afrika Respublikası və Eritreyaya 50 min ton taxıl tədarük edəcəyini vəd edib.

Eyni zamanda, BMT-nin məlumatına görə, “taxıl sazişi” dövründə Ukrayna 32,9 milyon ton kənd təsərrüfatı məhsulu (17 milyon ton qarğıdalı, 9 milyon ton buğda, 2 milyon ton günəbaxan unu və günəbaxan yağı) ixrac edə bilib. 

Rusiya iyulun 17-də birtərəfli qaydada sazişdən çıxıb və o vaxtdan bəri taxıl və liman infrastrukturunu hədəf alan raket zərbələri ilə Ukraynanın cənub bölgələrini terrora məruz qoyub.

Nicat