“Rosatom” korporasiyası bildirib ki, şirkət sanksiyalar altında olmadığı üçün Macarıstanda “Paks-2” AES-in tikintisində Qərb şirkətləri ilə əməkdaşlıq davam edir. 

Valyuta.az bu barədə "RİA Novosti"yə istinadən xəbər verir.

“Paks-2” AES layihəsi beynəlxalq xarakter daşıyır, avadanlığın əhəmiyyətli hissəsi beynəlxalq şirkətlər tərəfindən təmin edilir”, deyə korporasiyadan bildirilib.

Qeyd edilir ki, Amerikanın “General Electric” şirkəti atom elektrik stansiyalarını turbogenerator avadanlığı ilə təchiz edir, Avropanın “Framatome” və “Siemens” şirkətləri isə stansiyalar üçün prosesə avtomatik idarəetmə sisteminin (APCS) təchizatçılarıdır.

İyulun 18-də Rusiya və Macarıstan “Paks-2” AES-in kredit müqaviləsinə dəyişiklik edilməsi haqqında protokol imzalayıblar. İyulun 8-də Rusiya Federasiyası hökuməti "Paks-2" AES-in enerji bloklarının tikintisi üçün Macarıstana kreditin verilməsini təsdiqləyib.

"Paks" AES Macarıstanda işləyən yeganə atom elektrik stansiyasıdır. Sosializm dövründə tikilmiş AES Macarıstanda bütün elektrik enerjisinin demək olar ki, yarısını istehsal edir və AES-in iki yeni blokunun işə salınması onun istehsalının həcmini iki dəfə artıracaq.

"Paks" AES-də 5 və 6 nömrəli yeni enerji bloklarının birgə tikintisinə dair sənədlər Rusiya və Macarıstan arasında 2014-cü ildə imzalanıb. İşlərin ümumi dəyəri 12,5 milyard avro təşkil edəcək. "Paks-2" AES-in tikintisinə başlanılması 2023-cü ilin payızına planlaşdırılır.

Paşa Məmmədli