Çinin milyarder Cek Ma tərəfindən təsis edilmiş “Ant Group” və “Alibaba” şirkətləri iş adamı ilə hakimiyyət arasındakı münaqişə nəticəsində 850 milyard dollardan çox ziyana düşüb
.
Valyuta.az xəbər verir ki, bu barədə “Bloomberg” öz hesablamalarına istinadən məlumat yayıb.

Agentlik xatırladıb ki, milyarder təxminən üç il əvvəl Çin tənzimləyicisini tənqid edərkən biabır olub. Bundan sonra onun fintech startapı Ant Group-un IPO-su ləğv edilib və İT nəhəngi Alibaba altı hissəyə bölünməyə qərar verib. Bundan əlavə, Ant Group-a qarşı istintaq başladılıb və yalnız iyulun 6-da başa çatıb. Maliyyə şirkətində bir çox qanun pozuntusu aşkar edilərək 1 milyard dollar cərimələnib.

Bloomberg-in məlumatına görə, Ant Group dövlət bankları ilə rəqabətdən imtina edərək və bəzi iqtisadi əməliyyatlarını dayandıraraq biznes modelinə yenidən baxmalı olub. Bu səbəbdən şirkətin təxmini dəyəri 315 milyard dollardan 78,5 milyard dollara düşüb. “Alibaba”nın özü də İT sektoruna nəzarəti gücləndirmək qərarına gələn Çin hakimiyyətinin diqqət mərkəzində olduğu üçün ciddi təsirə məruz qalıb.

Agentliyin analitikləri hesab edirlər ki, “Alibaba”nın səhmləri Ant ilə bağlı tamamlanan araşdırma fonunda 8% artıb və şirkətin hazırda dəyəri təxminən 234 milyard dollardır. Lakin bu, şirkətin 2020-ci ildəki pik dəyərindən 620 milyard dollar azdır.

Martın sonunda The Wall Street Journal yazıb ki, Cek Ma bir il xaricdə qaldıqdan sonra Çinə qayıdıb. Bildirilir ki, iş adamı ötən ilin çox hissəsini Yaponiyada keçirib, Çin Yeni ilini isə Honq Konqda qeyd edib. Bundan əlavə, o, bu yaxınlarda  Sinqapur və Avstraliyaya səfər edib.

Nicat