Fransa hakimiyyəti Qazaxıstanın BTA Bankının keçmiş rəhbəri Muxtar Ablyazovun 30 gün ərzində ölkəni tərk etməsini tələb edib. 

Valyuta.az xəbər verir ki, bu barədə keçmiş bankirin özü "Facebook" səhifəsində məlumat verib.

“Mənə Fransanı tərk etmək üçün 30 gün vaxt verilib", deyə Ablyazov yazıb.

Keçmiş bankir Fransa hakimiyyətinin qərarına məhkəmələrdə etiraz etmək üçün maliyyə yardımı da istəyib.

Muxtar Ablyazov 2009-cu ildə əvvəllər rəhbərlik etdiyi BTA Bankın müflis olması və milliləşdirilməsindən sonra Qazaxıstanı tərk edib. O, cinayətkar qruplarda iştirak, əmlakı mənimsəmə, çirkli pulların yuyulması, vəzifə səlahiyyətlərindən sui-istifadə və bankın keçmiş rəhbəri Yerjan Tatişevi qətlə yetirməkdə təqsirli bilinərək qiyabi həbs cəzasına məhkum edilib. 

2012-ci ilin fevralında London Ali Məhkəməsi bankiri 22 ay həbs cəzasına məhkum etsə də, bu qərarın açıqlanmasına bir neçə saat qalmış Ablyazov Böyük Britaniyanı tərk edib. 2017-ci ildə Almatı məhkəməsi onu cinayətkar birlik yaratmaqda və BTA Bankın vəsaitlərini mənimsəməkdə təqsirli bilib və əmlakı müsadirə olunmaqla 20 il müddətinə azadlıqdan məhrum edilib. Korrupsiyaya Qarşı Mübarizə Milli Bürosunun məlumatına görə, keçmiş bankirin vurduğu ümumi zərər 7,5 milyard dolları ötür. 2018-ci ildə məhkəmə Ablyazovun rəhbərlik etdiyi Qazaxıstanın Demokratik Seçimi hərəkatını ekstremist təşkilat kimi tanıyıb və ölkədə onun fəaliyyətini qadağan edib.

Bankirin ekstradisiyasını Rusiya və Ukrayna da istəyir. Moskvanın Taqanski Məhkəməsi Ablyazova BTA Bank SC-dən 60 milyard rubla yaxın mənimsəmə işi üzrə hökm çıxarıb. 2015-ci ildə Fransanın baş naziri Manuel Vals Muxtar Ablyazovun Rusiyaya ekstradisiyasına qərar vermişdi, lakin Fransa Dövlət Şurası “siyasi motivlər” səbəbindən bu qərarı ləğv edib. 

Bankir Ukraynada 400 milyon dollar mənimsəməkdə ittiham olunub.

Paşa Məmmədli