Google şirkətinin həmtəsisçisi Sergey Brin Kaliforniya ştatının Malibu şəhərində 35 milyon dollarlıq malikanə alıb. 

Valyuta.az xəbər verir ki, bu barədə SFGate məlumat yayıb.

Qeyd olunur ki, ev əvvəllər amerikalı müğənni, dördqat Qremmi mükafatı laureatı, Rok-n-Roll Şöhrət Zalının üzvü Pat Benatara məxsus olub.

SFGate-in məlumatına görə, 557,5 kvadratmetrlik malikanənin altı yataq otağı var. Ev İT korporasiyalarından olan milyarderlərin yaşaması üçün məşhur yer hesab edilən Point Dume yaxınlığında yerləşir.

Həmçinin evdə gözəl mənzərəli hovuz, kamin otağı, kinoteatr, Katalina adasına mənzərəsi olan otaqlar və birbaşa Point Dume çimərliyinə aparan pilləkən var.

SFGate, xüsusilə Oracle həmtəsisçisi Larri Ellisonun sayəsində Malibu-nun texnoloji milyarderlər üçün arzuolunan yer olmağa davam etdiyini bildirib. Onun sahilyanı şəhərdə iyirmiyə qədər ayrı mülkə sahib olduğu bildirilir.

Bu, Brinin Point Dume-dəki ikinci evidir. 2020-ci ildə o, bir vaxtlar müğənni Pinkə məxsus olan ilk evi 13,5 milyon dollara alıb.

May ayında korporasiya yenilənmiş axtarış sistemini və süni intellekt elementləri ilə digər layihələri təqdim etdikdən sonra Sergey Brinin sərvəti 8,9 milyard dollar artaraq 102,1 milyard dollara çatıb.

Nicat