İqtisadi Əməkdaşlıq və İnkişaf Təşkilatı (OECD) çərşənbə günü dərc etdiyi son hesabatında dünya iqtisadiyyatının 2023-cü ildə 2,7 faiz, 2024-cü ildə isə 2,9 faiz artacağını gözləyir.

Valyuta.az bu barədə Çin mediasına istinadən xəbər verir.

"Aşağı enerji qiymətləri ev təsərrüfatlarının büdcələrindəki gərginliyi azaldır, biznes və istehlakçı əhval-ruhiyyəsi aşağı səviyyədən olsa da, bərpa olunur və Çinin yenidən açılması qlobal fəaliyyətə təkan verir", deyə hesabatda bildirilir.

Qeyd edilir ki, Avrozonada inflyasiyanın azalması real gəlirləri artırmağa kömək edəcək və ÜDM artımının 2023-cü ildəki 0,9 faizdən 2024-cü ildə 1,5 faizə yüksəlməsinə töhfə verəcək.

ABŞ-da ÜDM artımı sərt pul və maliyyə şərtlərinə cavab olaraq, 2024-cü ildə 1 faizə enəcək, 2023-cü ildə 1,6 faiz olacağı proqnozlaşdırılır.

Hesabatda qeyd olunur ki, yüksəliş kövrək olaraq qalır və risklər aşağıya doğru əyilir: "Əsas narahatlıqlardan biri inflyasiyanın gözlənildiyindən daha davamlı olmağa davam etməsidir".

G20 ölkələrində istehlak qiymətlərinin illik inflyasiyasının 2022-ci ildəki 7,8 faizdən 2023-cü ildə 6,1 faizə, 2024-cü ildə isə 4,7 faizə enəcəyi proqnozlaşdırılır ki, bu da enerji və ərzaq pərakəndə satış qiymətlərinin azalması, tələb təzyiqlərinin yumşaldılmasına kömək edir.

İqtisadi artım hədəflərini saxlamaq üçün OECD ölkələrə öz maliyyə siyasətlərini düzəltməyi və davamlı artımı təşviq etməyi tövsiyə edir.

OECD-nin Baş katibi Matias Kormann proqnozlaşdırılan iqtisadi canlanmanın əvvəlkindən bir qədər daha optimist olduğunu bildirib. Lakin onun sözlərinə görə, iqtisadiyyatların yaşıl və rəqəmsal transformasiyalarını təmin etməklə yanaşı, məhsuldarlığı artırmaq üçün struktur islahatlarına üstünlük vermək vacib olaraq qalır. 

Paşa Məmmədli