Avropa İttifaqı sentyabrın 15-dək Ukraynadan bəzi kənd təsərrüfatı məhsullarının Polşa, Macarıstan, Rumıniya, Bolqarıstan və Slovakiyaya idxalına qoyulan qadağanı mərhələli şəkildə aradan qaldıracaq.

Valyuta.az Ukrayna mətbuatına istinadla xəbər verir ki, məhdudiyyətlər dörd məhsul - buğda, qarğıdalı, kolza və günəbaxan toxumu üzrə 17 tarif xəttindən altı tarif xəttinə endiriləcək. Bu barədə Avropa Komissiyasının mətbuat xidmətinin yaydığı məlumatda bildirlir.

Bundan əlavə, Ukraynanın Aİ-yə ixracı üçün idxal rüsumlarının, kvotaların və ticarətin qorunması tədbirlərinin dayandırılmasının daha bir il davam edəcəyi bildirilir.
Avropa Komissiyası bildirib ki, məhdudiyyətlərin mərhələli şəkildə aradan qaldırılması “həmrəylik yollarını” yaxşılaşdıracaq və yeni məhsul yığımından sonra Ukrayna taxılının ölkədən ixracı ilə bağlı problemləri həll edəcək.

Mayın 2-də Avropa Komissiyası Avropa İttifaqının beş ölkəsinə - Bolqarıstan, Macarıstan, Polşa, Rumıniya və Slovakiyaya dörd Ukrayna məhsulunun idxalına qadağa qoyub. Qərar "ciddi logistik çətinliklər" səbəbindən qəbul edilib.

Nicat