Qlobal istiləşmə Qara dənizdə bir çox növlərin yox olmasına gətirib çıxaracaq və bu prosesi dayandırmaq mümkün deyil. 

Valyuta.az Unian-a istinadla xəbər verir ki, bu proqnozu türkiyəli geoloq, doktor Osman Bektaş səsləndirib.

O qeyd edib ki, Qara dəniz üç qatdan ibarətdir: zəhərli qazlar olan aşağı təbəqə, təxminən səkkiz dərəcə Selsi temperaturu ilə kondisioner funksiyasını yerinə yetirən ara təbəqə və oksigen və dəniz həyatı ilə zəngin olan yuxarı təbəqə.

Eyni zamanda qlobal istiləşmə səbəbindən orta təbəqə nazikləşməyə başlayıb və Bektaş gələcəkdə alt təbəqədən çıxan zəhərli qazların üst təbəqəyə qarışaraq bütün canlıların ölümünə səbəb olacağı barədə xəbərdarlıq edir. O qeyd edir ki, bu vəziyyəti dəyişdirmək və ya geri qaytarmaq olmaz.

Bununla belə, qlobal istiləşmə insanların həyatına da təhlükə yaradır.

Ekseter Universitetinin alimlərinin son məlumatlarına görə, əsrin sonuna qədər Yer səthinin temperaturu 2,7°C yüksələcək və bu səbəbdən dünya əhalisinin 20%-i ölüm təhlükəsi ilə üz-üzədir.

Xüsusilə Hindistanda (600 milyon), Nigeriyada (300 milyon), İndoneziyada (100 milyon), o cümlədən Filippin və Pakistanda (hər biri 80 milyon) bəzi regionların əhalisi dözülməz iqlim şəraiti ilə üzləşə bilər.

Qlobal istiləşmə haqda nə məlumdur?

Yaxın gələcəkdə insanlar tarixin ən isti ilini gözləyir - 5 il ərzində orta qlobal temperatur 1,5 dərəcəni keçəcək. Həmçinin, bəşəriyyəti “su böhranı” gözləyir – proqnozlar göstərir ki, 2050-ci ilə qədər dünyanın bu gün belə problem olmayan regionlarında da su qıtlığı yaşanacaq.

Həmçinin Yer kürəsində şirin su anbarları quruyur - son 30 ildə ən böyük göllərin və su anbarlarının yarısından çoxu yüzlərlə kub kilometr su itirib.

Nicat