Son günlər türk lirəsinin ABŞ dolları qarşısında yenidən ucuzlaşması müşahidə olunur. Ucuzlaşmanın əsas səbəbi Türkiyənin cari əməliyyat balansında kəsirin böyüməsidir. 

Valyuta.Az xəbər verir ki, Türkiyənin iqtisadi göstəricilərinin pisləşməsi səbəbindən dünyanın ən böyük banklarından olan HSBC lirənin məzənnəsi ilə bağlı bədbin proqnoz açıqlayıb. 

HSBC hesab edir ki, dollar/lirə məzənnəsinin ilin sonuna qədər korreksiyası böyük olacaq. Adıçəkilən bank ilin sonuna dollar/lirə proqnozunu 21-dən 24-ə qaldırıb. 

Bank 2023-cü ilin ikinci rübü üçün proqnozunu 19,5-dən 20-yə, üçüncü rübün sonu üçün isə 20-dən 23-ə yüksəldib. 

Mayın 14-də keçiriləcək seçkilərin iqtisadi və pul siyasətlərində dəyişiklik gətirə biləcəyini ifadə edən HSBC, pul siyasətlərinin orta və uzunmüddətli perspektivdə türk lirəsinin perspektivi üçün mərkəz nöqtəsi olacağını vurğulayıb. Bununla belə, HSBC seçkinin nəticələrindən asılı olmayaraq, ilin ikinci yarısında məzənnənin ciddi korreksiya edəcəyinə inanmaqda davam etdiklərini də bildirib. //Sfera