Şimal ölkəsinin maliyyə nazirinin müavini Aleksey Moiseyev bildirib ki, Maliyyə Nazirliyi və Mərkəzi Bank mövqelərini razılaşdırıb və beynəlxalq ödənişlər üçün "kripto”dan istifadənin leqallaşdırılması qərarna gəliblər. 

 

"Həm bizə, həm də Mərkəzi Banka artıq aydındır ki, indiki şəraitdə biz kriptovalyutada transsərhəd hesablaşmalar olmadan vəziyyətdən çıxa bilmərik”, deyə nazir müavini "Rossiya 24” telekanalına müsahibəsində bildirib.

 

Amma Moiseyevin sözlərinə görə, Mərkəzi Bankla Maliyyə Nazirliyi arasında fikir ayrılığı yalnız tənzimləmə məsələlərində qalıb: Məmurlar kriptovalyuta ilə ödənişlərə nəzarət etmək istəyirlər ki, "pulların yuyulması, narkotiklərə görə ödənişlər olmasın”.

 

Maliyyə Nazirliyi rusiyalılara pasportla və Mərkəzi Bankın nəzarəti altında kriptovalyuta pulqabı açmağı təklif edir. Moiseyev qeyd edib ki, payıza doğru mayninq haqqında qanun qəbul edilə bilər.

 

Qaynarinfo-ya açıqlamasında Rusiyanın kriptovalyutadan istifadəyə keçmək niyyətini dəyərləndirən "Liberal iqtisadçılar” mərkəzinin sədri Akif Nəsirli bu addımın real nəticələr verəcəyinə o qədər də inanmır. Amma bununla belə, düşünür ki, həmin addım baş tutarsa, Rusiya bir sıra problemlərini həll etməyə nail olacaq:

 

 

"Rusiya əvvəlki dövrdə istəyib ki, digər ölkələr aldığı məhsulun pulunu rublla ödəsin. Lakin digər ölkələr bununla razılaşmayıb. Çünki rublla vəsait ödəyən ölkə və sahibkar xeyli əziyyət çəkir, həm də müəyyən itkilərə məruz qalır. Əvəzində isə Rusiya divident əldə edir. Yəni rublla ticarətdə hər iki tərəf deyil, yalnız bir tərəf qazanır. Nəticədə belə əqdlər Rusiya ilə əlaqələrin səviyyəsinin azalmasına gətirib çıxarır. 

 

Artıq Rusiya əvəzinə alternativ əlaqələr qurmaq imkanında olan sahibkarlar bu ölkədən imtina edir. Moskva da bunun qarşısnı almaq üçün variantlar axtarır ki, onlardan biri də kriptovalyutalarla əqdlərin həyata keçirilməsidir. Bu addım həm innovatik baxımından irəliləyişdir, həm də müasir tələblərə cavab verən qarşılıqlı tədavül vasitəsidir. Bundan istifadə edərək, Moskva onunla əlaqə qurmaqdan imtina edən və alternativ axtaran sahibkarların axtarışları dayandıraraq, onların Rusiya şirkərlərilə əlaqələrinin davam etdirilməsinə çalışır. Amma məsələ ondadır ki, onun realizasiyası bir qədər çətindir. Burada intelektual bilgi ortaya qoyulmalı, mütəxəssislər olmalıdır. Hansı kriptovalyutadan istifadənin səmərəli olduğu müəyyənləşdirilməlidir. Lakin indiki vəziyyətdə Rusiyadan xaricə beyin axını güclənib. Bu baxımdan Rusiyanın kriptovalyuta üzərindən tədavül etmək cəhdləri baş tutmaya bilər. Baş tutsa, bu Rusiya üçün bir sıra problemlərini həll etməyə qadir bir variantdır”.