Fransa "TotalEnergies" neft şirkətinin Rusiya hərbçiləri üçün reaktiv yanacaq tədarükündə iştirakı ilə bağlı araşdırma aparacaq. Nəqliyyat naziri Klement Bon hələlik kifayət qədər məlumatın olmadığını bildirib.

Bu barədə Valyuta.Az "Reuters”ə istinadən xəbər verir.

"Bu, son dərəcə ciddi mövzudur, ona görə də könüllü olaraq sanksiyalardan yayınma olub-olmadığını, yaxud Fransa və ya başqa bir şirkət tərəfindən istehsal edilmiş enerji təchizatının olub-olmadığını araşdırmaq lazımdır”, - nazir France 2-yə deyib.

Məsələ ilə bağlı tərəf tutmaq üçün kifayət qədər məlumatı olmadığını deyən Bon, prezident Emmanuel Makronun Ukrayna danışıqlarındakı səylərini sarsıda biləcək ittihamları şərh edən ilk Fransa hökumət rəsmisi olub.

"Le Monde” qəzeti çərşənbə günü yazıb ki, "TotalEnergies” Fransa firmasının Rusiyanın "Novatek” şirkəti ilə birgə müəssisədəki payı vasitəsilə Ukraynada Rusiya hərbi təyyarələri tərəfindən istifadə oluna biləcək reaktiv yanacaq istehsalı üçün qaz kondensatının tədarükü ilə məşğul olub.

Qəzet əlavə edib ki, Ukraynadakı hava hücumlarında iştirak etdiyi güman edilən iki Rusiya Hərbi Hava Qüvvələri bazasına çatdırılan reaktiv yanacaq "TotalEnergies”in 49%-nə sahib olduğu "Terneftegaz”ın tədarük etdiyi qaz kondensatından istehsal edilib.

Böyük Qərb rəqiblərindən fərqli olaraq, tənqidlərə baxmayaraq, Rusiyadakı aktivlərini saxlayan "TotalEnergies” bildirib ki, o, Rusiya ordusunu təmin edəcək infrastrukturu idarə etmir və biznes tərəfdaşlarının potensial reaktiv yanacağı istehsalından xəbərsizdir.