Rusiyalı iş adamı Roman Abramoviçin ABŞ-ın hedc fondlarında olan investisiyaları Böyük Britaniya hökumətinin ona qarşı sanksiyalar tətbiq etməsindən sonra dondurulub.

"APA-Economics"in "Reuters"ə istinadən verdiyi xəbərə görə, bu barədə "The Wall Street Journal" (WSJ) məlumat yayıb. WSJ bildirib ki, bu ilin fevral ayının sonundan etibarən iş adamı ABŞ-ın bir neçə investisiya fondundakı səhmlərini təkrar bazara çıxarıb satmağa çalışsa da, sanksiyalar buna imkan verməyib.
Nəşr investisiya fondlarının inzibatçılığı ilə məşqul olan "SS&C Globe Op" şirkətinin R. Abramoviçə aid olan şirkətə göndərdiyi əməliyyatların bloklanması barəsində olan mesaja istinad edir.

Qeyd edək ki, ötən gün Kanada Abramoviç də daxil olmaqla 5 rusiyalı iş adamına sanksiya tətbiq edib və 32 Rusiya şirkəti və dövlət qurumunun Kanadadan müdafiə avadanlığı və ya təchizat almasına qadağa qoyub.

Hedc fondu - səciyyəvi olaraq, çox gəlirli mövqeləri götürməklə və qısa alış, svop, derivativlər, proqram ticarəti və arbitraj kimi aqressiv strategiyalardan istifadə etməklə qəfil və qısamüddətli bazar dəyişikliklərindən yüksək gəlir əldə etməyə can atan özəl investisiya fondudur.