"Rus oliqarxların xaricdəki mülk və hesablarının müsadirə olunması mövcud vəziyyətdə Rusiyaya ən güclü təsir göstərəcək”.

Bunu Qaynarinfo-ya açıqlamasında politoloq Zərdüşt Əlizadə Moskvanın qondarma DXR və LXR-i tanıması fonunda Ukraynaya hücum edəcəyi təqdirdə Qərbin tətbiq edəcəyi daha kəskin sanksiyaların Rusiyaya nə dərəcədə təsir edib-etməyəcəyinə aydınlıq gətirərkən deyib:

"Hələlik Bayden qondarma DXR və LXR-ə qarşı sanksiyalar elan edib. Amma Rusiya Ukraynaya qarşı təcavüzə başlasa, növbəti cəza tədbirləri Moskvaya qarşı yönələcək. Bu zaman Moskvaya təsir edəcək ən güclü vasitələrdən biri Rusiyanın SİFT banklararası ödəmə sistemindən ayrılması, rus qaz və neftinin alınmasının minimum həddə endirilməsi, qabaqcıl texnologiyaların verilməsinin qadağan edilməsi, hərbi siyasi, mədəni əməkdaşlığın minimuma endirilməsi kimi sanksiyalar olacaq. Bunlar da təsir göstərməsə, Böyük Britaniyanın elan etdiyi kimi rus oliqarxlarının xaricdəki mal, mülk, malikanə və hesabları müsadirə oluna bilər. Düşünürəm ki, Rusiyaya qarşı ən güclü təzyiq vasitəsi məhz budur. Bir neçə yüz rus oliqarxının pulu müsadirə olunsa, əminəm ki, onlar Putini devirəcəklər. Yəni onlar Putinə səfeh siyasətilə bu qədər böyük pullarının itirilməsini bağışlamayacaqlar”.

Məsələ barədə saytımıza danışan iqtisadçı ekspert Natiq Cəfərli də Rusiyanın daha kəskin sanksiyalardan böyük zərər görəcəyini düşünür:

"Hər şey sanksiyaların miqyası və hansı həddə qədər qəbul olunacağından asılıdır. Rusiya 2008-ci ildən üzü bəri sanksiyalarla yaşayır. Amma buna baxmayaraq, Rusiya iqtisadiyyatı buna adaptasiya olub. İndiki halda, Putinin məlum qərarı Rusiya səhm bazarında ciddi çöküş yaşadıb, bazar 20 faiz dəyər itirib. Bununla belə, hələlik elan olunan sanksiyalar gözləntilərə cavab vermir. SİFT maliyyə sistemindən ayrılsa, neft-qaz və texnologiya satışına qadağa qoyulsa, bu halda təbii ki, Rusiya iqtisadiyyatı daha ciddi fəsadlarla üz-üzə qalacaq. Rusiya milli valyutası 1 dollara nisbətdə 100 rublu da keçə bilər. Nəticədə Rusiya iqtisadiyyatı yarıbayarı kiçiləcək”.