Rusiya Mərkəzi Bankı 10 Sentyabr 2021-ci il tarixli yığıncağında pul siyasətini sərtləşdirmə dövrünü davam etdirib və əsas faiz dərəcəsini daha 0,25 faiz bəndi artıraraq 6.50%-dən 6.75%-ə yüksəldib.

İqtisadçıların proqnozu da faizin 0,25 ya da 0,50 bənd artırılaraq 6,75 və ya 7% səviyyəsinə çatdırılacağı istiqamətində idi.

Ekspertlərin fikrincə, artım dövrü bununla bitməyəcək.

Qərar yüksək inflyasiya gözləntiləri nəzərə alınmaqla qəbul edilib.

Bu il Rusiyada inflyasiya sürətlənib. Mərkəzi Bank faizi artıraraq inflyasiyanı azaltmağa çalışır. Avqust ayında Rusiyada illik inflyasiya iyul ayındakı 6.46%-ə qarşı 6.68%-ə yüksəlib.

"İstehsalın artması imkanları ilə müqayisədə tələbin daha sürətli genişlənməsi səbəbindən sabit amillərin inflyasiyaya verdiyi töhfə əhəmiyyətli olaraq qalır.  İnflyasiya hədəfdən yuxarıya doğru daha da yüksələ bilər" , -Rusiya Bankı bildirir.

Mərkəzi Bank, iqtisadi vəziyyətin baza proqnozuna uyğun olaraq inkişaf edəcəyi təqdirdə "növbəti yığıncaqlarda əsas faiz dərəcəsinin daha da yüksəlmə ehtimalını" qəbul edir.

Rusiya Bankı əsas faiz dərəcəsini ardıcıl 5-ci dəfədir artırır. Sonuncu dəfə Mərkəzi Bank 1 faiz bəndi faizini qaldırmışdı və bu onun 2014 -cü ildən bəri ən qətiyyətli addımı idi.

Mənbə: Marja.az