Ciddi maliyyə nəzarətinə baxmayaraq, müxtəlif ölkələrdə çirkli pulların yuyulması cəhdləri və mexanizmləri genişlənir.

Valyuta.az-ın Marja.az-a istinadən verdiyi xəbərə görə, BMT-nin Narkotik vasitələr və Cinayət Ofisinin (UNODC) hesablamalarına görə, il ərzində çirkli pulların yuyulması əməliyyatlarının həcmi qlobal ÜDM-in 2-5%-i, yaxud 800 milyard-2 trilyon dollar arasında dəyişir.

Müvafiq olaraq, maliyyə nəzarəti qurumlarının bu əməliyyatlara görə tətbiq etdiyi cəza və cərimələrin də həcmi artır. Marja Financial Times-a istinadla xəbər verir ki, ötən il tənzimləyici orqanlar bu cinayətlərə görə 2,2 milyard dollar maliyyə sanksiyası tətbiq edib. 2019-cu ildə bu rəqəm 444 milyon dollar olub.

İdarəetmə və risklər üzrə konsaltinq şirkəti “Kroll” bu ilin ilk yarısında çirkli pulların yuyulması ilə mübarizədə 1 milyard dollara yaxın cərimənin tətbiq olunduğunu bildirir. Əvvəlki illərdə liderlik edən ABŞ-dan fərqli olaraq, bu ilki cərimələrin yarıdan çoxu Avropa İttifaqının payına düşür.

Bu ilin ən iri cərimələri:

Niderlandın ABN Amro Bankı uzun illər çirkli pulların yuyulmasına qarşı mübarizə qanunvericiliyini pozduğu üçün 480 milyon avro (562,6 milyon dollar) cərimələnib;

ABŞ-ın kredit kart şirkəti Capital One Maliyyə Nazirliyi tərəfindən 390 milyon dollar məbləğində cərimələnib.

Həmçinin, Böyük Britaniyanın Maliyyə Nəzarəti Qurumu NatWest bankı ilə əlaqədar cinayət araşdırmalarına başlayıb. Faktlar təsdiq olunarsa, məhkəmənin banka qarşı qeyri-məhdud həcmdə cərimə tətbiq etmək səlahiyyəti var.

Britaniya Milli Cinayət Agentliyi təkcə çirkli pulların yuyulması mexanizmlərinin ölkəyə hər il 100 milyard funt-sterlinq (136 milyard dollardan çox) ziyan vurduğunu ehtimal edir.