Beynəlxalq Valyuta Fondunun (BVF) ehtiyatlarının (SDR – BVF-nin hesab vahidi, xüsusi borcalma hüquqları) 650 mlrd. ABŞ dolları artırılması ölkələrin likvidliyini və ehtiyatlarını artıracaq, COVID-19 pandemiyasının yaratdığı böhrandan çıxmalarına kömək edəcək.

Valyuta.az-ın "APA-Economics"ə istinadən verdiyi məlumata görə, bu barədə BVF-nin idarəedici direktoru Kristalina Georgiyeva tərəfindən cümə günü Fondun İcra Heyətinin SDR-lərin buraxılması təklifini dəstəkləmə qərarı ilə əlaqədar yaydığı açıqlamada deyilir.

Vəsaitlərin ayrılması təşəbbüsü nəzərdən keçirilməsi və təsdiqlənməsi üçün BVF-nin İdarə Heyətinə təqdim ediləcək. Plan təsdiqlənsə, avqust ayının sonunda qüvvəyə minəcək.

"Bu, bütün dünya üçün bir təşviq rolunu oynayacaq. SDR-lərin paylanması bütün üzv dövlətlərimizin likvidliyini və ehtiyatlarını artıracaq, inamı gücləndirəcək və dünya iqtisadiyyatının dayanıqlığını və sabitliyini gücləndirməyə kömək edəcək", - K. Georgiyeva bildirib.

Onun sözlərinə görə, 2009-cu ildə ehtiyatların genişləndirilməsi qlobal maliyyə böhranından qurtulmağa əhəmiyyətli bir töhfə verdi:

"Əminəm ki, yeni paylamanın indi də eyni faydalı təsiri olacaq, BVF-nin hər bir üzvünə, xüsusən həssas ölkələrə kömək edəcək və COVID-19-un səbəb olduğu böhrana cavab tədbirlərini gücləndirəcək".

K. Georgieva BVF-nin önümüzdəki aylarda SDR-lərin daha zəngin ölkələrdən kasıb və daha həssas ölkələrə könüllü köçürülməsi istiqamətində dövlətlərlə aktiv qarşılıqlı əlaqələrini davam etdirəcəyini bildirib.