Fed-in Federal Açıq Bazar Komitəsinin (FOMC) üzvü və Sent-Luis Fed sədri Ceyms Bullard, qiymətli kağız alış proqramını azaltmaq barədə müzakirənin başladığını və özünün 2022-ci ilin sonunda faizin artırılacağını gözlədiyini bildirib. 

Valyuta.az-ın Marja.az-a istinadən verdiyi xəbərə görə, bu açıqlamadan sonra dollar güclənib.

ABŞ Mərkəzi Bankının (Fed) faiz artırmaq barədə proqnozlarını önə çəkməsinin ardından bazarlarda dalğalanma davam edir. Federal Açıq Bazar Komitəsinin (FOMC) üzvü Ceyms Bullard bazarlarda növbəti hərəkətə səbəb olmuş bir çıxış edib.

Sent-Luis Fed sədri Ceyms Bullard, Fed sədri Cerom Pauellin bu həftə qiymətli kağız alışını azaltmaq müzakirələrini rəsmi olaraq başlatdığını bildirib.

İnflyasiya hədəflərinə çatmaq üçün siyasətlərini düzəltməyə ehtiyac olduğunu qeyd edən Bullard, qiymətli kağız alışlarının azaldılmasına dair müzakirələrin gələcək həftələrdə davam edəcəyini vurğulayıb.

Bullard, pandemiyanın sona yaxınlaşılması gələn il faizin artırılmasına başlanacağına inanan 7 Fed rəsmisindən biri olduğunu bildirib.

Bullard, Fed-in pandemiyadan sonra ilk faiz artımını 2022-nin sonunda etməsini gözlədiyini söyləyib.

Bullard, 2022-ci il ərzində 2,5% - 3% arasında olacaq yüksək inflyasiyanın faizi artırmaq üçün lazım olan şərtləri təmin edəcəyini dilə gətirib.

"Yaxşı bir il və yaxşı bir başlanğıc olmasını gözləyirdik, amma gözlədiyimizdən də yaxşı bir il oldu. Gözlədiyimizdən daha yüksək bir inflyasiya var və burada bir az "şahinləşməmizin" çox təbii olduğunu düşünürəm", - deyən Bullard, 2021-ci ildə inflyasiyanın 3% olmasını gözlədiyini söyləyib.

Bullardın açıqlamasından sonra Dollar bahalaşıb.