Konsultasiya şirkətlərinin sayı günü-gündən artır. Bildirilir ki, müasir iş dünyasında konsultasiya şirkətlərinin rolu böyükdür. Bu şirkətlər müştərilərinə müxtəlif istiqamətlərdə xidmətlər təklif edirlər. 

Mövzu ilə bağlı Valyuta.az-a danışan “Profity Co.” şirkətinin həmtəsisçisi və direktoru Vüsal Sultanlı qeyd edib ki, konsultasiya şirkətləri biznes problemlərinin həlli, strateji planlaşdırma, marketinq, PR, vergi ödəmələri, insan resurslarının idarə edilməsi və layihələrin icrası kimi müxtəlif sahələrdə xidmətlər göstərir: 

“Bu şirkətlər müştərilərə daha effektiv fəaliyyət göstərmək və bazarda mövqelərini gücləndirmək üçün dəstək verir. Onların biznes modeli xidmət əsaslı yanaşma üzərində qurulur. Təqdim edilən xidmətlər ya saatlıq, ya da layihə əsasında qiymətləndirilir. Bəzi hallarda isə müştərinin əldə etdiyi nəticələrə əsaslanan qiymətləndirmə tətbiq edilir.

Konsultasiya şirkətləri geniş sənaye sahələrinə xidmət göstərmək potensialına malikdir. Məsələn, maliyyə və bankçılıq sektorunda kredit risklərinin idarə olunması və maliyyə planlaşdırılması kimi xidmətlər təklif olunur.

Səhiyyə sahəsində isə keyfiyyət təminatı və strateji idarəetmə sahələrində dəstək göstərilə bilər.

Texnologiya sahəsində fəaliyyət göstərən startaplar üçün məhsulun inkişafı və bazara çıxış strategiyalarının hazırlanması əsas xidmətlərdəndir.

Bundan əlavə, ticarət və istehsalat sektorunda təchizat zəncirinin optimallaşdırılması, əyləncə və media sahəsində isə PR və marketinq planlarının tərtib edilməsi kimi həllər də təqdim olunur. Bu xidmətlərin miqyası çox genişdir və analitik təhlillərdən strateji dəyişikliklərə qədər müxtəlif istiqamətləri əhatə edir. Məqsəd hər bir müştərinin spesifik tələblərinə uyğun həllər təqdim etməkdir.

Azərbaycanın geopolitik və iqtisadi uğurları nəticəsində idxal və ixrac olunan məhsul, xidmət və platformaların inkişaf səviyyəsi əhəmiyyətli dərəcədə yüksəlib. Bununla əlaqədar olaraq, konsultasiya xidmətlərinin diversifikasiyası da genişlənib”.

“Şirkət yalnız nəzəri yanaşmalara əsaslanmamalı, real nəticələrə fokuslanmalıdır”

V.Sultanlı bildirib ki, konsultasiya şirkəti idarə etmək bir çox mühüm məsələyə diqqət yetirməyi tələb edir:

“İlk növbədə, müştərilərin ehtiyaclarını düzgün anlamaq və onlara uyğun həllər təqdim etmək vacibdir. Şirkət yalnız nəzəri yanaşmalara əsaslanmamalı, real nəticələrə fokuslanmalıdır. Bu yanaşma müştərilərin etibarını artırır və uzunmüddətli əməkdaşlıqlara şərait yaradır.

Keyfiyyətli xidmətlər təqdim etmək əsas prioritetlərdən biridir. Bunun üçün ixtisaslı və təcrübəli mütəxəssislərin işə cəlb olunması mühümdür. Komanda yalnız texniki biliklərə deyil, eyni zamanda müştərilərlə düzgün ünsiyyət qurmaq, problemləri təhlil etmək və effektiv həllər hazırlamaq bacarığına malik olmalıdır. 

Texnologiyanın biznes proseslərinə inteqrasiyası da önəmlidir. Məsələn, süni intellekt və data analitikası vasitəsilə problemləri daha dəqiq müəyyən etmək və optimal həllər təqdim etmək mümkündür. Eyni zamanda, müasir idarəetmə alətləri işin səmərəliliyini artırmağa kömək edir”. 

“İşgüzar əlaqələr brendin imicini gücləndirir”

İşgüzar əlaqələrin konsultasiya şirkətlərinin bazardakı mövqeyini gücləndirmək və davamlı müştəri axını təmin etmək üçün vacib alət olduğunu deyən həmtəsisçi işgüzar əlaqələrin üstünlükləri haqqında da danışıb:

“Birinci üstünlük müştərilərlə etibarlı münasibətlərin qurulmasıdır. Müştəri şirkətə güvəndikdə, bu münasibət yalnız bir layihə ilə məhdudlaşmır, gələcəkdə daha çox əməkdaşlıqların əsasını qoyur. Bununla yanaşı, mövcud müştərilərin tövsiyələri yeni müştərilərin cəlb edilməsinə şərait yaradır ki, bu da marketinq xərclərinin azalmasına səbəb olur.

İkinci üstünlük bazar məlumatlarının əldə edilməsidir. İşgüzar şəbəkələr vasitəsilə müxtəlif sənaye sahələrindəki trendlər, yeniliklər və rəqiblərin strategiyaları barədə məlumat əldə etmək mümkündür. Bu məlumatlar isə xidmətlərin təkmilləşdirilməsi və rəqabət üstünlüyü əldə edilməsi üçün istifadə edilir.
Üçüncü üstünlük resurslara çıxış imkanlarının genişlənməsidir. İşgüzar münasibətlər vasitəsilə tərəfdaş şirkətlərlə daha sərfəli şərtlərlə əməkdaşlıq etmək və layihələr üçün zəruri resurslara çıxış əldə etmək mümkündür. Ümumiyyətlə, işgüzar əlaqələr brendin imicini gücləndirir və şirkətin bazarda daha dayanıqlı mövqe tutmasına yardım edir”.

“Diferensiallaşma əsas uğur amillərindən biridir”

V.Sultanlı bazarda fəaliyyət göstərən çoxsaylı konsultasiya şirkətləri arasında rəqabət səviyyəsinin də kifayət qədər yüksək olduğunu vurğulayıb:

“Bazarda dayanıqlı olmaq ciddi strateji yanaşma tələb edir. Xüsusilə, eyni xidmətləri təklif edən şirkətlər bu sahədə uğur qazanmaq üçün öz strategiyalarını fərqləndirməli və müştərilərinə unikal dəyər təklif etməlidirlər. Diferensiallaşma məhz bu kontekstdə əsas uğur amillərindən biridir. Konsultasiya şirkətləri rəqiblərindən seçilmək üçün ya müəyyən ixtisaslaşmış sahələrdə fəaliyyət göstərməli, ya da müştəri ehtiyaclarına uyğun fərdi xidmətlər təqdim etməlidirlər.

Eyni zamanda, texnologiyaların tətbiqi də rəqabətdə üstünlük əldə etməyə imkan verir. Süni intellekt, data analitikası və avtomatlaşdırılmış sistemlərdən istifadə şirkətlərə daha sürətli və effektiv həllər təqdim etməyə şərait yaradır. Bu yanaşma xidmət keyfiyyətini artırmaqla yanaşı, müştəri məmnuniyyətinin təmin olunmasına da xidmət edir.

Şirkətin brend reputasiyasını gücləndirmək də mühüm əhəmiyyət kəsb edir. Yüksək keyfiyyətli xidmətlər və müsbət müştəri rəyləri şirkətin bazardakı nüfuzunu artırır. Müştərilər üçün bir şirkətin etibarlılığı və təcrübəsi önəmli seçim meyarlarından biridir.

Bundan əlavə, işçi heyətinin davamlı inkişafı da dayanıqlı uğur üçün vacibdir. Komandanın peşəkarlıq səviyyəsi nə qədər yüksək olarsa, müştərilərin məmnunluğu bir o qədər artar”.

“Son olaraq, bazar şəraitinə və müştərilərin dəyişən tələblərinə operativ reaksiya vermək qabiliyyəti şirkətin rəqabət üstünlüyünü qorumaq üçün vacibdir. Müştəri ehtiyaclarını vaxtında başa düşmək və onlara uyğunlaşmaq, bazarda uzunmüddətli dayanıqlığın təmin olunmasında mühüm rol oynayır”, - deyə qeyd edib.

Maya Hüseynova