Elşən Bədirxanov
   İdarəetmə üzrə konsultant və təlimçi 

“Netflix” hesab edir ki, uğurunun özəyində isdedadların yüksək konsentrasiyası və ulduz komandanın yaradılması durur. Yəni, hər mövqedə bazardakı ən peşəkar insanları cəlb etmək müsbət korporativ mədəniyyətin və idarəetmənin yaranması üçün ilkin şərtdir. Yalnız bundan sonra səlahiyyətlərin geniş ötürülməsi, yüksək effektivlik və s. prinsiplərin tətbiqi mümkündür.

Bu fikrə necə gəldilər?

“Dotcom” böhranından sonra “Netflix”in biznesi azalanda ilk (və yeganə) dəfə kütləvi ixtisara əl atıldı. Ən istedadlı və gözləntilərə tam uyğun olan 80 nəfər saxlanılaraq, qalan 40 nəfərlə sağollaşdılar. Bundan sonra sehrli dəyişikliklər baş verməyə başladı. Qalan əməkdaşların motivasiyası əvvəlkindən daha yüksək oldu, iş həcmi artdıqdan sonra şirkət eyni heyətlə işin öhdəsindən gəldi. CEO Rid Hastinqs və HR rəhbəri Patti belə qənaətə gəldilər ki, səbəb isdedadların konsentrasiyasındadır. Hətta 1-2 ortabab əməkdaş hamını işdən soyuda bilər.