Məşhur simalardan reklamlarda istifadə geniş yayılıb. Çünki bununla bağlı uğurlu işlər çoxdur. Lakin bəzən məşhur sima ilə edilən reklamlarda da uğursuzluq halları yaşanır. Məsələn, bir avtomobil reklamına çəkilən məşhur özü başqa avtomobil istifadə edirsə, bu zaman ortaya ziddiyət çıxır. Yaxud bu gün bankın reklamına çəkilən məşhur simanı başqa bankın reklamında görürük. Bu hallar nə dərəcədə doğrudur? Məşhur simaları reklama çəkən zaman hansı nüanslar nəzərə alınmalıdır?

Valyuta.az-a danışan "Viva" kommunikasiya agentliyinin təsisçisi, kommunikasiya eksperti Vüqar Baba deyir ki, məşhur şəxslərin hansısa markaya, layihəyə sima seçilməsi korporativ kommunikasiyanın uzunmüddətli effekt verən və eyni zamanda məsuliyyətli formalarından biridir:

“Sima seçilərkən həmin şəxsin peşəkar və şəxsi fəaliyyətinin "üzü" olacağı xidmət və ya məhsulla uyğun olub-olmamasına diqqət edilməlidir. Keçmişdə və hazırda brendin xüsusiyyətləri və verdiyi mesajlarla nə qədər ortaq və əks nöqtələr olduğu yoxlanılmalıdır. Daha sonra, bu populyar şəxsin rəqib markalarla əlaqəsi, keçmişdə birgə PR, marketinq layihələrində iştirakı araşdırılmalıdır. Bu şəxsin həmçinin hazırda hər hansı bir brendlə iş birliyinin olmamasına fikir verilməlidir”. 

Ekspert bildirdi ki, tarixçəsi, maraqları, peşəkar fəaliyyəti, obrazı uyğun şəxs seçildikdən sonra isə bu sima olacaq şəxsin paralel formada bir neçə qurumla əməkdaşlıq etməsi qarşılıqlı razılıqla məhdudlaşdırılmalıdır:

“Məsələn, “X” il ərzində ya ümumi, ya da seçilmiş brendin fəaliyyət sahəsinə yaxın markalarla əməkdaşlığı qadağan edilməlidir. Təbii ki, adətən, bunun üçün həmin məşhura kompensasiya məbləği ödənilir. Bu cür peşəkar qaydalarla isə yalnız ciddi, öz reputasiyasına önəm verən müəssisələr və məşhurlar işləyir”.

Əvəz Həsənov